Lokalet e natës sidomos në Tiranë por edhe në qytete të tjera, kryesisht ato bregdetare, janë një problem i vazhdueshëm për qytetarët.
Në Tiranë herë pas here ka pasur ankesa por edhe procedime për shkak të zhurmave, duke pasur parasysh faktin që shumë bare apo lokale janë pranë pallateve, ose në të njëjtën godinë, gjë që kthehet në një shqetësim për banorët.
Policia e Shtetit vijon zbatimin e masave për rritjen e parametrave të sigurisë sidomos gjatë fundjavës.
Grupe kontrolli janë ngritur në të gjitha qendrat urbane dhe zonat bregdetare, për parandalimin e ndotjes akusitke. Vetëm 2 ditë më parë gjatë kontrolleve u evidentuan 6 raste dhe do të procedohen penalisht 6 shtetas, pronarë dhe menaxherë të disa subjekteve, që prishën qetësinë publike duke shqetësuar banorët, pasi kishin vënë muzikë të lartë në ambientet e lokaleve të tyre.
5 raste janë evidentuar në Tiranë dhe 1 rast është evidentuar në Ksamil. Policia ka sekuestruar pajisjet që gjenerojnë muzikën si dhe ka proceduar pronarët dhe menaxherët e këtyre lokaleve.
