Zhvlerësimi i fortë i euros ka nisur tashmë të japë efektet në ekonomi. Të shumtë janë aktorët që po dëmtohen nga rënia e monedhës europiane, ndërsa nga kjo situatë ka edhe përfitues.
Nënçmimi i euros është reflektuar në depozitat në valutë pasi gjatë prillit shënuan rënie në 817 miliardë lekë, nga 848.3 miliardë lekë që ishin në fillim të këtij viti.
Këstet e kredive në euro nga ana tjetër janë bërë më të lira duke bërë që kredimarrësit në valutë të paguajnë më pak, ndërsa për ata që kanë marrë hua në lekë janë shtrenjtuar ndjeshëm me rritjen e normës së interesit.
Efektet e forcimit të lekut dhe dobësimit të euros janë materializuar edhe tregtinë e jashtme. Të dhënat e Instat tregojnë se në maj eksportet ranë me 5 miliardë lekë, pra gati 47 milionë euro më pak mallra të shitura nga kompanitë shqiptare drejt tregjeve të huaja.
Nga kjo situatë po preken drejtpërdrejt edhe shqiptarët e varur nga remitancat, pra dërgesat e emigrantëve që në pjesën e parë të vitit shënuan vlera rekord, së bashku me prurjet e turistëve.
Ndërsa sezoni turistik ka nisur dhe flukset hyrëse në valutë pritet të rriten ndjeshëm në muajt në vijim, me shumë gjasë euro do të zhvlerësohet edhe më tej në raport me monedhën kombëtare, lekun.
