Furrat të cilat prodhojnë produkte të tjera përveç bukës kanë marrë kërkesë nga OSHEE dhe Enti Rregullator i Energjisë që të paguajnë tarifa energjie si çdo biznes tjetër.
“Ka shumë abuzime nga bizneset që marrin licensën për prodhim buke dhe nga ana tjetër më tepër shërbejnë si lokale ose pastiçeri.”, shprehet eksperti i energjetikës Azmer Duleviç në një intervistë për emisionin “Në radio” të gazetarit Andri Xhahu.
ERE ka vendosur tarifën e subvencionuar të energjisë elektrike prej 7,6 lekë për KWh vetëm për prodhuesit e bukës masive.
“Nuk është e drejtë që një biznes që prodhon vetëm bukë dhe një tjetër që ka marrë licensë për furrë buke dhe shërben kafe ta paguajnë energjinë elektrike njësoj. Kjo e dëmton konkurrencën.
Ka biznese familjare që prodhojnë vetëm bukë, janë të vetëpunësuar dhe nuk ofrojnë shërbime të tjera. Këto biznese duhen mbrojtur. Ndërsa të tjerat duhet ta paguajnë energjinë me çmimin real të tregut që është 18 lekë.”
Sipas ekspertit zgjidhja do të ishte vendosja e dy matësve të energjisë elektrike. “Një matës për biznesin që ka furrën që prodhon bukën masive dhe një tjetër për shërbimet ekstra që ofrohen në këtë biznes.
Për furrën e bukës e paguan me 7.6 lekë energjinë, ndërsa kafenenë me çmimin normal të tregut. Gjithashtu shteti t’u mundësojë këtyre bizneseve subvencione për vetëprodhimin e energjisë nëse kanë mundësi të vendosin panele fotovoltaike.”
E rëndësishme është që si fillim të bëhet një verifikim në terren. “Nga Shoqata e Mbrojtjes së Konsumatorit unë kam marrë disa njoftime që në Tiranë me licensën e një furre buke janë shtatë lokale të lidhur.
Është vjedhje e hapur dhe shpërdorim shumë i madh. Duhet bërë një verifikim nëse 5144 furra buke në kryeqytet realisht prodhojnë bukë apo ofrojnë dhe shërbime të tjera.”
Shoqata e Prodhuesve të Bukës midis të tjerave ka kërkuar tarifim alternativ 9.5 lekë. “Nuk është e drejtë sepse me këtë çmim preket dhe biznesi famijar që prodhon vetëm bukë dhe do të detyrohet të rrisë çmimin e bukës.”
Por a mund të ketë një rritje të mundshme të çmimit të bukës nëse rritet çmimi i energjisë për bizneset që nuk prodhojnë vetëm bukë? “Për arsye të çmimit të energjisë elektrike nuk parashikoj të ketë rritje të çmimit të bukës. Është garancia e çmimit të mbrojtur prej 7.6 lekësh.” – u shpreh Duleviç.
