Ish-kreu i PD-së, Lulzim Basha ka reaguar në lidhje me vendimin e kryeministrit Edi Rama për shkarkimin e ministrit të Brendshëm, Bledi Çuçi dhe propozimin e emrit të Taulant Ballës për ta zëvendësuar.
Në një postim në rrjetet sociale, Basha shkruan pas dy ditësh pasi ka ndodhur ngjarja e Krujës, se nuk mund të kalohet vetëm me rrokadë emrash, pasi sipas tij, dhunuesi më i madh prej vitesh është vetë qeveria e ndërtuar mbi lidhjet e saj me krimin i cili sot e kontrollon kokë e këmbë.
Basha shkruan se largimi i Çuçit dhe ardhja e Ballës nuk ndryshon asgjë veç rradhës së mbrojtjes së interesave të klaneve dhe grupeve kriminale. Ai shton më tej se Shqipëria nuk mund të vazhdojë të mbetet në duart e klaneve kriminale, prandaj sipas tij, është jetike ndarja e politikës nga krimi.
Reagimi i plotë:
Ngjarja e Fushë Krujës nuk mund të kalojë thjesht dhe vetëm me rrokadë emrash. Ajo nuk është një rast i izoluar, të tilla ka përditë, ku me arrogancë të pushtetshmit e Edi Ramës dhunojnë qytetarët, familjet, bizneset, gazetarët dhe opozitarët. Por dhunuesi më i madh prej vitesh është vetë qeveria e ndërtuar mbi lidhjet e saj me krimin i cili sot e kontrollon kokë e këmbë.
Per sa kohë Edi Rama, njeriu që përfaqëson, lidh dhe mbron interesat e krimit dhe oligarkisë do ta drejtojë qeverinë, ngjarje të tilla do të vijojnë të jenë të përditshme, pjesa më e madhe fatkeqësisht jashtë vëmendjes mediatike. Largimi i Çuçit dhe ardhja e Ballës nuk ndryshon asgjë veç rradhës së mbrojtjes së interesave të klaneve dhe grupeve kriminale.
Shqipëria nuk mund të vazhdojë të mbetet në duart e klaneve kriminale. Prandaj është jetike ndarja e politikës nga krimi, lufta kundër korrupsionit dhe vetingu i politikaneve. Vetëm kështu parlamenti dhe qeverisja do të pastrohen dhe kthehen në shërbim dhe jo dhunim të qytetarëve.
