Vendimi i Parlamentit për heqjen e imunitetit të deputetit Arben Ahmetaj ka mbërritur në Prokurorinë e Posaçme.
Pas këtij momenti, tashmë Ahmetaj si qytetar i thjeshtë do përballet me drejtësinë. Pritet që kërkesa e prokurorisë të dorëzohet tashmë në Gjykatë e cila do miratojë edhe masën e sigurisë ndaj tij.
Pas marrjes së vendimit nga ana e Gjykatës së Posaçme, Prokuroria do ia delegojë vendimin e Gjykatës Policisë së Shtetit, për ta ekzekutuar atë.
Duke qenë se ish-zv/kryeministri prej së premtes ka lënë Shqipërinë, pas procedurave standarde si kontrolli i banesës së Ahmetajt, apo njerëzve të tij të afërt ku mund të jetë, pritet që ai të shpallet në kërkim ndërkombëtar, për 3 akuzat që SPAK ka ngritur ndaj tij.
Me 117 vota pro dhe tre abstenim, Kuvendi i ka dhënë dritën jeshile arrestimit të Arben Ahmetajt, deputetit socialist dhe njëherësh ish-zv.kryeministër.
Mes deputetëve që votuan pro arrestimit të Arben Ahmetajt ishte dhe vetë kryeministri Edi Rama.
3 deputetët që abstenuan janë Vangjel Dule, Agron Duka dhe Fatmir Mediu.
