Rruga Orikum–Dukat, me gjatësi 14,75 kilometra është një prej investimeve më të rëndësishme infrastrukturore për qytetin e Vlorës dhe gjithë jugun e Shqipërisë.
Kryeministri Edi Rama publikoi sot në rrjetet sociale pamje nga rruga e re Orikum – Dukat, ende në punë e sipër, por e hapur përkohësisht për të lehtësuar qarkullimin e automjeteve.
Aksi Orikum-Dukat është një tjetër segment i rëndësishëm, i cili lidh bajpasin e Vlorës me tunelin e Llogorasë dhe është pjesë e paketës për përmirësimin e infrastrukturës rrugore, e cila do të bëjë të mundur lehtësimin e qarkullimit drejt bregdetit të jugut duke nxitur zhvillimin e turizmit.
Hapja për qarkullimin e automjeteve shkurton maksimalisht distancën drejt bregdetit dhe i jep një frymëmarrje të re turizmit dhe ekonomisë së zonës.
Rruga e ndërtuar sipas standardeve më të mira, rrit sigurinë e lëvizjes dhe lehtëson qarkullimin, pasi ky aks shmang kalim në rrugën që kalon në shpatin e malit të Dukatit.
Ky aks rrugor është i kategorisë C dhe i jep zgjidhje problematikave që lidhen me sigurinë rrugore dhe rrëshqitjet, të cilat prej vitesh në aksin aktual kanë qenë një shqetësim për përdoruesit e rrugës.
Projekti i rrugës përfshin edhe ndërtimin e 5 urave dhe një tuneli panoramik
