Ekipi i forcave zjarrfikëse dhe efektivët shqiptare kanë përfunduar misionin e tyre në Greqi, e cila u përfshi nga zjarret javët e fundit.
Kjo është konfirmuar nga kryeministri Edi Rama, i cili thotë se ndihet krenar që Shqipëria ndihmoi vendin fqinj në një moment të vështirë.
Ai ka shpërndarë një foto të ekipit ndërsa thotë se trupa të specializuara të emergjencave civile të bashkive të Korçës dhe Maliqit, u angazhuan në operacionet e ndihmës për shuarjen e zjarreve dhe kthehen në atdhe me detyrën e kryer.
“Efektivët shqiptarë përfundojnë me sukses misionin në Greqinë e goditur nga zjarret masive
Trupa të specializuara të emergjencave civile dhe pjesëtarë të ekipeve të emergjencave të bashkive të Korçës dhe Maliqit, u angazhuan në operacionet e ndihmës për shuarjen e zjarreve dhe kthehen në atdhe me detyrën të kryer, e me ndjenjën e krenarisë për kontributin e tyre në ndihmë të popullit mik grek në një moment të vështirë.”-shkruan Rama. / S.M
