Qeveria do të vijojë me rritjen e pagave në 2024 kryesisht në sektorët prioritarë si shëndetësia, arsimi, siguria, mbrojtja. Kjo u parashikua në strategjinë afatmesme buxhetore 2024 -2026 publikuar në Fletore Zyrtare para disa javësh. Kështu për vitin 2024, parashikohen të përfitojnë nga rishikimi i politikës së rritjes së pagave mjekët, Forcat e Armatosura, Policia e Shtetit, Garda dhe punonjësit e burgjeve. Parashikohen të përfitojnë nga rishikimi i politikës së rritjes së pagave. -Rreth 18,858 punonjës të Sistemit Shëndetësor, ku përgjatë dy viteve do të realizohet rritja mesatare për mjekët dhe infermierët që varion nga 26-34% të pagës bruto; -6,756 punonjës të Forcave të Armatosura që përfitojnë rritje të pagës për gradë me 4- 22% për vitin 2024; -Rreth 12,120 punonjës të Gardës së Republikës dhe Policisë së Shtetit, të cilët përfitojnë rritje të pagës për gradë me 7 % për vitin 2023 dhe 21-35% në vitin 2024; -Rreth 3.566 punonjës të Policisë së Burgjeve, të cilët përfitojnë rritje të pagës për grade me 7% për vitin 2023 dhe 22-36% në vitin 2024;
Shtesa do të aplikohet në muajin prill
Si fillim prioritet kryesor do të marrin mjekët, në mënyrë që të përdoret si një masë për të parandaluar eksodin në radhët e tyre. Shtesa do të aplikohet në muajin prill ndërsa përveç mjekëve të përgjithshëm, nga skema do të përfitojnë edhe infermierët. Detajet u zbuluan dje nga zv/ministrja e Shëndetësisë Entela Ramosaçaj. Në muajin prill të këtij viti për mjekët specializantë rritja e pagës ishte me 50 mijë lekë në muaj. Ndërsa për mjekët e përgjithshëm dhe infermierët me 7 për qind. E ftuar në emisionin “Box to Box” në televizionin “Scan”, zv/ministrja u ndal edhe tek programi i kreditimit me interes zero për profesionistët e shëndetësisë, për të cilët janë ofruar 100 kuota. Të favorizuar veç atyre të cilët punojnë larg qendrës së banimit janë edhe ata me kontrata pune me afat të pacaktuar.
Qeveria rritje qesharake të pensioneve
Edhe pse pagat po rriten për administratën dhe kategori të tjera, qeveria mori një vendim qesharak për pensionistët. Me çmimet e rritura dhe shpenzimet e larta, rritja e pensioneve me 8.6% që hyri në fuqi më 5 tetor është e pamjaftueshme për këtë kategori për të përballuar jetesën. Pensionistët gjithë këto ditë kanë reaguar të revoltuar në media. “Ça mi goce 150 mijë lekë, ça blen me 150 mijë lekë? Të jetë të paktën 10 mijë lekë në ditë, 300 mijë në muaj, që të jetoj. Me çfarë do jetoj, po drita, ujë, ilaç rrobash, për të ngrënë, për të pirë, me ça do merren ato?” thotë një pensionist. “Ilaçet janë të gjitha pa rimbursim, ujë, drita, interneti, iku gjysma e pensionit”, shprehet një pensioniste. Në ditët e pazarit, qeset e tyre mbushen vetëm me produktet bazike. Mishi, djathi e peshku janë tashmë “luks”. “Mish e peshk harroje. Marrim makarona, mbushim tasin e kaq”, thotë një i moshuar. Ata kërkojnë një rritje reale dhe duket se e kanë të qartë sa duan. “Sa e ka ai zyrtari që punon, se ne kemi punuar. Kam punuar 47 vjet e marr 200 mijë lekë, ai akoma s’ka filluar punën e merr 1 milion”, shprehet një tjetër. Gjithashtu ditën e djeshme ka bërë bujë një i moshuar, i cili doli paradite në protestë para kryeministrisë për të kërkuar përmirësimin e jetesës së pensionistëve por dhe për të kërkuar rritjen e pensionit që do u siguronte një jetë të denjë siç u takon. Në dorë Militiadh Muci, 80 vjeç mban një pankartë ku shkruan: Turp! Mos luaj me bonusin e pensionistëve!” Ish polici, në dorë mban dhe një letër të cilën thotë se do ia dërgojë me postë kryeministrit Edi Rama. “Bonusi u tha që do të jepej në mars para zgjedhjeve. Perimet janë rritur dy herë, për frutat nuk bëhet fjalë” Edhe pse i vetëm vendosi të protestojë për vete dhe bashkëmoshatarët e tij, megjithëse është i vetëdijshëm se reagimi i tij nuk do të sjellë ndryshim. “ Edi mos luaj me ditët e fundit të jetës tonë. Sot protestoj jo se do sjell ndryshimin, por të shpreh “urrejtjen” ndaj deputetëve që votuan dyfishimin e pagës së tyre, veçanërisht Edi Ramës, “Kryepolic të vendit tim”, t’i them je demagog i paparë. Nëse do shpërndash bonusin e vitit 2024, me siguri do na njoftosh një vit përpara, për atë të vitit 2025./E.T
