Kryetari i grupit të PD-së, Gazment Bardhi ka thyer heshtjen duke reaguar për vendimin e SPAK-ut që vendosi dy masa sigurimi për Sali Berishën për dosjen e kompleksit “Partizani” që i çoi në burg dhëndrin, Jamarbër Malltezi.
Deputeti i PD-së, thotë se SPAK-u po nxitohet duke kërkuar dy masa për Berishën pa kaluar kërkesën në Kuvend, pasi ish-kryeministri gëzon imunitet.
Thekson se nuk është kundër drejtësisë, po i kërkon që të zbatojë ligjin, që sipas tij është i qartë kur thotë se cdo procedurë për masat ndaj deputetit duhet të kalojë përmes parlamentit.
“Grupi Parlamentar i Partisë Demokratike ka mbështetur në mënyrë të pakushtëzuar prej fillimit Reformën në Drejtësi dhe punën e SPAK. Personalisht mbështes pa asnjë rezervë barazinë e cilitdo përpara ligjit. Në një vend demokratik duhet të ketë zero imunitet për parlamentarët.
Mirëpo, Kushtetuta e Shqipërisë në rastin e të zgjedhurve ka ofruar disa garanci shtesë, që duhet të sigurohen pa asnjë përjashtim. Kur ndaj një deputeti duhet të caktohet një masë sigurimi që kufizon lirinë në çfarëdo lloj forme, prokurori është i detyruar të kërkojë autorizim nga Kuvendi.
Dje jam njohur me vendimin e zbardhur të Gjykatës së Posacme kundër Korrupsionit dhe Krimit të Organizuar që cakton në mënyrë të njëkohshme dy masa sigurimi ndaj z. Sali Berisha. Të dyja masat e sigurimit kufizojnë lirinë e tij të lëvizjes.
Kufizimi i lirisë së lëvizjes së z. Sali Berishës, pa autorizim të Kuvendit, është një shkelje e rëndë kushtetuese që ngre pikëpyetje të forta mbi arsyet e nxitimit të SPAK. Personalisht do të votoja në favor të çdo kërkese të organeve të drejtësisë që do të vinte në Kuvend” tha ai./ S.M
