Ditën e sotme pritet të merret në pyetje nga GJKKO ish-kryeministrin Sali Berisha. Seanca e marrjes në pyetje do të zhvillohet në orën 14:00.
Nuk dihet nëse Berisha do t’i përgjigjet kësaj kërkese pasi më parë është shprehur se nuk e njeh vendimin e gjykatës.
Gjykata e cilëson si të njoftuar Berishën për vendimin dhe më pas është e detyruar të zbatojë procedurën.
Berisha është ai që vendos nëse do të jetë i pranishëm apo jo në seancë ose mund t’i drejtohet Gjykatës së Apelit për të kundërshtuar vendimin.
Në dosjen “Partizani” dhëndëri i Berishës, Jamarbër Malltezi dhe Fatmir Bektashi akuzohen për “korrupsion” dhe “pastrim parash”, ndërsa ish-kryeministri vetëm për “korrupsion pasiv”.
Malltezi dyshohet se ka kryer korrupsion pasiv në bashkëpunim me vjehrrin e tij Sali Berisha, duke shfrytëzuar pushtetin e tij si kryeministër, duke përfituar nga privatizimi i terreneve dhe objekteve sportive, nga ndryshimi i destinacionit nga zona sportive në zona banimi, shuma të konsiderueshme në cilësinë e investuesit nga shoqëria “Homeplan” sh.p.k., pa investuar në të, si dhe përfitime të marra para se të deklarohej si bashkëortak në këtë shoqëri./ S.M
