Skenaret e seancës së sotme parlamentare të çojnë të gjitha në një drejtim, në tensione. Kuvendi pritet të nisë punimet për seancën e sotme në orën 17:00.
Por për këtë seancë, 23 deputetët e opozitës, janë ndaluar të jenë pjesë, pas masës disiplinore përjashtim për pjesëmarrje në komisione dhe në seancë plenare fillon që më 20 tetor deri më 30 tetor 2023.
Por kjo masë, nuk dihet a do të zbatohet nga deputetët të cilët janë shprehur se do të jenë të pranishëm dhe të mblidhen para ndërtesës së Parlamentit në orën 16:30 minuta për të shkuar së bashku në seancë.
“Nesër e hënë, ora 17:00, është planifikuar seanca e radhës plenare. Pavarësisht vendimit të përjashtimit arbitrar, i cili parashikon përjashtimin tonë për 11 ditë, ne duhet të jemi të gjithë në seancë. Për këtë qëllim, mblidhemi të gjithë bashkë në orën 16:30 për të shkuar në grup në seancë. Ndërkohë, mbledhja e radhës e grupit do të zhvillohet si zakonisht, të martën, datë 31 Tetor, ora 13:00!” shkruhej në mesazhin e Bardhit drejtuar deputetëve të Rithemelimit.
Nuk dihet nëse garda do t’i lejojë apo jo deputetët të hyjnë sot në seancë, ndërsa skenari më i mundshëm, është që të ata të mos lejohen të marrin pjesë./ S.M
