Arsenali fiton me rezultat tenistik 6-0 ndaj Lensit në kuadër të xhiros së pestë në Ligën e Kampionëve në grupin B.
Epërsinë “Topçinjve” ia dha Kai Havertz pasi shënoi për 1-0 në minutën e 13-të.
Vendasit dyfishuan epërsinë në minutën e 21-të ku kësaj radhe Gabriel Jesus realizoi për 2-0 me një gol të bukur.
Vetëm tre minuta më vonë, Bukayo Saka u gjend në vendin e duhur dhe në kohën e duhur për të çuar shifrat në 3-0 pas vetëm 23 minutave lojë.
Francezët kërkuan penallti në minutën e 36-të por VAR-i bëri me dije se gjithçka ishte e pastër dhe ndeshja vazhdoi.
Arsenali nuk u ndal më kaq dhe shënoi edhe dy gola tjerë. Fillimisht me anë të Gabriel Martinellit në minutën e 27-të dhe më pas me Odegaard në minutën e 46-të.
Me rezultat 5-0 u mbyll pjesa e parë e këtij takimi.
Pjesa e dytë ishtë ‘e varfër’ sa i përket golave me Arsenalin që shënoi edhe një herë tjetër në minutën e 86-të me anë të Jorginhos për rezultatin e thellë 6-0.
Arsenali tashmë ka siguruar kualifikimin dhe është lider i grupit me 12 pikë, katër më shumë se vendi i dytë PSV Eindhoven.
Në ndeshjen tjetër të këtij grupi, atë mes Sevilla dhe PSV, fitues dolën holandezët me rezultatin 2-3. Spanjollët ishin në avantazhin e dy golave, por u përmbysën në fraksionin e dytë pas daljes me të kuqe të Ocampos e tashmë nuk kanë më shans për kualifikim.
