Vetëm pak javë na ndan nga Krishtlindja por në Gjermaninë jugore, veçanërisht në Bavari, qytetet janë të veshura me të bardha. Reshjet e dendura të borës, megjithatë, sollën edhe probleme të mëdha në qarkullimin ajror dhe hekurudhor.
Në Mynih, rreth 160 fluturime u anuluan pasi avionët nuk mund të ngriheshin apo ulen, tha një zëdhënës i aeroportit për Agjencinë Gjermane të Lajmeve.
Shërbimi Kombëtar i motit i Gjermanisë (DWD) parashikon vazhdimin e reshjeve të borës deri sot pasdite në pjesën më të madhe të Bavarisë, ndërsa në disa zona lartësia e borës pritet të arrijë në 30 deri në 40 centimetra.
Për këtë arsye edhe sot priten probleme në aeroporte.
Megjithatë, probleme ka edhe me linjat e autobusëve dhe tramvajit në kryeqytetin bavarez, të cilat u anuluan mbrëmjen e së premtes, për shkak të borës dhe ngricave.
Ndërsa departamenti i zjarrfikësve të Mynihut postoi foto në rrjetet sociale të zjarrfikësve të veshur me zinxhirë në automjete “në mënyrë që të mund të vijmë tek ju sa më të sigurt në çdo kohë”.
Reshjet e dendura të borës të së premtes erdhën pas një jave plot me temperatura të ulëta të fillimit të hershëm të dimrit – krahasuar me vitet e fundit –në të gjithë Gjermaninë.
Megjithatë, nuk ka pasur pothuajse asnjë aksident. Sipas një gazetari të Agjencisë Gjermane, pasagjerët e trenit nga Shtutgarti e kaluan natën në tren në stacionin Ulm për shkak të borës, ndërsa në Mynih zyrtarët e stacionit qendror hekurudhor vunë në shërbim të pasagjerëve një tren, të cilit itineraret u anuluan për shkak të kushteve të pafavorshme atmosferike.
Bora ra edhe në Frankfurt dhe Berlin gjatë javës, ndërkohë që pjesa më e madhe e vendit regjistroi reshje të lehta bore ose temperatura të ulëta./e.t
