Presidenti rus Vladimir Putin ka paralajmëruar se do të ketë “probleme” me Finlandën fqinje pasi ajo u bashkua me Organizatën e Traktatit të Atlantikut të Veriut (NATO) në fillim të këtij viti.
Hyrja e Finlandës në NATO shënoi një ndryshim të madh në peizazhin e sigurisë në Evropën veriore dhe shtoi rreth 1300 kilometra (830 milje) në kufirin e aleancës me Rusinë.
Ky akt, ishte gjithashtu një goditje për presidentin Putin, i cili prej kohësh ka paralajmëruar se wshtw kundër zgjerimit të NATO-s.
“Ata (Perëndimi) morën Finlandën dhe e tërhoqën zvarrë në NATO! Pse, a kishim ndonjë mosmarrëveshje me Finlandën? Të gjitha mosmarrëveshjet, përfshirë ato të një natyre territoriale në mesin e shekullit të 20-të, janë zgjidhur të gjitha shumë kohë më parë”, tha Putin në një intervistë të botuar të dielën.
“Nuk kishte probleme, por tani do të ketë, sepse ne tani do të krijojmë distriktin ushtarak të Leningradit atje dhe patjetër do të përqendrojmë njësitë ushtarake atje”, shtoi Putin në intervistën e transmetuesit shtetëror rus Rusia 1.
Putin gjithashtu hodhi poshtë si “të pakuptimta” komentet e presidentit amerikan Joe Biden, i cili në fillim të këtij muaji paralajmëroi se Putini do të “vazhdonte” nëse merr Ukrainën, duke sugjeruar se Rusia mund të sulmojë përfundimisht një aleat të NATO-s dhe të tërheqë trupat amerikane në konflikt.
Udhëheqësi rus tha se Rusia “nuk ka asnjë arsye, asnjë interes, asnjë interes gjeopolitik, as ekonomik, as politik, as ushtarak, për të luftuar me vendet e NATO-s”, duke shtuar se Moska nuk ka asnjë pretendim territorial në vendet e NATO-s.
“Nuk ka dëshirë për të prishur marrëdhëniet me ta (vendet e NATO-s), ne jemi të interesuar të zhvillojmë marrëdhëniet”, shtoi Putin.
Edhe përpara se Putin të niste pushtimin e tij në Ukrainë, ai kishte kërkuar NATO-s të kufizonte zgjerimin e saj. Megjithatë, ishte lufta që “ndryshoi mjedisin e sigurisë së Finlandës“, duke nxitur dëshirën e kombit nordik për t’u bashkuar me aleancën, tha Presidenti Sauli Niinistö në maj të 2022, kur njoftoi se vendi i tij do të kërkonte të bashkohej.
Brenda pak muajve nga aplikimi i saj, qeveria finlandeze tha se do të shpenzojë rreth 143 milionë dollarë për ndërtimin e gardheve penguese përgjatë kufirit lindor 830 milje të Finlandës me Rusinë, të cilat dikur kishin pak mbrojtje sigurie.
Finlanda përsëri mbylli të gjithë kufirin e saj me Rusinë këtë javë, mbi pretendimet se qindra njerëz po përpiqeshin të kalonin pa vizë.
Pasi u njoftua një tjetër mbyllje muajin e kaluar, kryeministri finlandez Petteri Orpo akuzoi Rusinë se “mundësoi instrumentalizimin e njerëzve dhe i udhëzon ata drejt kufirit finlandez në kushte të vështira dimri. Finlanda është e vendosur t’i japë fund këtij fenomeni.”/ kb
