INSTAT: Tirana, Gjirokastra dhe Fieri qarqet më të prekura
Sëmundjet tumorale në Shqipëri po pësojnë rritje. Pothuajse çdo vit në Shqipëri regjistrohen mbi 6 mijë raste të reja me kancer.
Një studim i fundit i Institutit të Shëndetit Publik tregon se tumoret me numër më të shpeshtë të rasteve të reja të diagnostikuara në Shqipëri janë kanceri i mushkërive, kanceri i gjirit dhe tumoret e lëkurës. Këto tumore së bashku përbëjnë pothuaj 40% të të gjitha tumoreve të reja të raportuara nga sistemi shëndetësor.
Kanceri i lëkurës dhe i mushkërisë zënë peshën kryesore, përkatësisht me 16 dhe 13 %.
Meshkujt janë në risk më të lartë, si për t’u prekur nga tumoret edhe për të humbur jetën prej tyre. Veç të tjerash, ky fakt dëshmon edhe ekspozimin më të lartë të meshkujve ndaj faktorëve risk, apo prevalencën më të lartë mes tyre të sjelljeve më pak të shëndetshme.
Incidenca e kancerit të mushkërive është mbi 4 herë më e lartë në meshkujt krahasuar me femrat.
Shtrimet në spital nga tumoret kanë ardhur në rritje të vazhdueshme si për meshkujt edhe për femrat.
Tirana, Gjirokastra, Fieri dhe Berati janë qarqet me incidencë përgjithësisht më të lartë vjetore të tumoreve, ndërsa Shkodra, Vlora, Dibra dhe deri diku Durrësi, raportojnë incidencë më të ulët.
Niveli i incidencës në qarkun e Tiranës është pak më i lartë se mesatarja e vendit dhe rastet e reja për Tiranën përbëjnë barrën më të madhe (mbi 31%) të totalit të rasteve të raportuara nga gjithë vendi.
Rritjen e sëmundshmërisë, bluzat e bardha e lidhin me mënyrën e jetesës dhe të ushqyerjes, për të cilën rekomandojnë sa më shumë aktivitet fizik./O.S
