Avokati i Belerit, Eugen Gjyzari tha para gazetarëve se i gjithë procesi është i parregullt dhe po tejzgjatet në mënyrë që çështja të mos shkojë në Strasburg. Ai komentoi po ashtu edhe mbi dëshminë e specialistes në Drejtorinë e Burgjeve, Anila Paçe. Sipas avokatit ajo nuk ka qëndrueshmëri në deklaratat e saj para trupës gjykuese.
“Jam pyetur përpara disa muajsh nga Prokuroria e Posaçme për dëshminë e penalitetit të Belerit. Kam dhënë dëshmi përpara agjentëve të BKH. Institucionet shtetërore kanë akses në regjistrat gjyqosorë, për të parë nëse një shtetas është apo jo i dënuar. Në rast se një person rezulton i dënuar, prokuroria në këtë rast, dërgon kërkesë për historikun e tij. Dokumenti printohet vetëm në rast se një person është i pandënuar. Prokuroria nuk kq akses të printojë dënimin. Të dhënat vihen në dispozicion nga ne. Në rastin Beleri, në regjistrin e gjendjes gjyqësore rezulton i “rehabilituar”. Unë si specialiste, për kërkesat individuale nga e-Albania” e çaktivizoj sistemin kur rezulton “I dënuar” dhe ia jap “I padënuar”. Prokuroria e Vlorës ka të drejtën të hyjë në sistem. Prokuroritë shohin vetëm nëse një person është i dënuar apo i pandënuar, por nuk kanë akses në të dhëna të tjera. Në këtë rast KQZ ka bërë akses me shkrim ku kërkoi të dhëna për gjendjen gjyqsore dhe unë i kam dërguar të dhënat që është i dënuar”, mësohet të ketë thënë në SPAK dëshmitarja, raporton gazetarja e Klan News Glidona Daci.
Kujtojmë se vetëm 3 ditë më parë, Apeli i Posaçëm rrëzoi kërkesën e Belerit për t’u betuar si kreu i bashkisë Himarë. Beleri akuzohet se ka blerë vota në zgjedhjet vendore të 14 Majit./O.S
