Lushnje, specialistët këshillojnë fermerët për të pasur prodhim të bollshëm
Java nisi me shi, por reshjet kanë munguar prej disa javësh. Temperaturat mbeten të larta krahasuar me normalet e stinës. Kjo ka dhënë efekte në bujqësi dhe pemtari. Sythet kanë çelur si pasojë e motit të ngrohtë, por specialistët e bujqësisë i druhen uljes së temperaturave.
Nëse do të ketë mot të ftohtë, atëherë do të ketë edhe dëme në të mbjella dhe te frutorët.
Ferdinat Shahi (Drejtor i Bujqësisë në Lushnje): Këto luhatje bëjnë që të aktivizohen sythet e bimëve tek pemët frutore të cilat bëjnë lëvizjen e lëngjeve. Pastaj një rënie e temperaturave bën shkatërrimin e sytheve që janë gjysmë të çelur.
Specialistët e bujqësisë janë në kontakt të vazhdueshëm me fermerët për t’i këshilluar në këtë situatë.
Kadri Gaxho (specialist bujqësie): Ne kemi një planifikim dhe njëkohësisht koordinohemi me ta për problemet që atyre u dalin në terren.
Ferdinat Shani (Drejtor i Bujqësisë në Lushnje): Këshilla kryesore tani janë spërkatjet dimërore që bëhen në të gjithë fruti-kulturën.
Probleme në bujqësi nga moti ka patur edhe në vitet e kaluara. Vitin që lamë pas për shkak të luhatjes së temperaturave pati dëme e për pasojë ulje të prodhimit./O.S
