Ambasadori i Ukrainës në vendin tonë, Volodymyr Shkurov ka shprehur mirënjohjen për Shqipërinë që u hapi dyert ukrainasve që u detyruar të largohen pas nisjes së agresionit rus.
Në një manifestim të organizuar në Tiranë, në solidaritet me popullin e Ukrainës, diplomati Shkurov u shpreh se ndihma e aletëve ka qenë e çmuar. Ambsadori theksoi se agresioni rus gjatë këtyre dy viteve i ka treguar Ukrainës se kush janë miqtë dhe armiqtë e saj.
“Ju falënderoj për mbështetjen dhe solidaritetin për atë që ne jemi këtu sot, për të dënuar agresionin rus ndaj Ukrainës. Asnjëherë nuk do e harrojmë mëngjesin e para dy viteve si sot. Këto dy vite agresioni na kanë treguar cilët janë miqtë dhe armiqtë tanë.
Ukrainasit guximtarë patën besim në veten e tyre dhe po luftojnë edhe sot për fitoren ndaj agresorit. Më dhemb kur e them që Rusia po mbledh trupa dhe numër të madh ushtarësh. Mbi 20% e Ukrainës është sot e pushtuar. Tani Rusia ka rritur numrin e sulmeve masive mbi territorin ukrainas me përdorimin e raketave dhe dronëve të ndryshëm.
Jam mirënjohës për qeverinë shqiptare që ka zgjatur rezidencën për ukrainasit që u detyruan të largohen nga vendi i tyre. Falënderoj aleatët tanë që kanë dhënë ndihmën e tyre të çmuar. Dua të falënderoj bashkinë e Tiranës për ndihmën e vazhdueshme dhe një përshëndetje për të gjithë pjesëtarët e politikës shqiptare dhe përfaqësuesit e ambasadave që janë prezentë këtu”, tha diplomati Shkurov./O.S
