Në mungesë të Sali Berishës, “i ardhuri i fundit” me një grup deputetësh, Gazmend Bardhi, po afishohet gjithnjë e më shumë si lider i PD-së së Rithemelimit. Ai ka dalë në terren në takime me qytetarët në fushatën e parakohëshme për zgjedhjet e vitit 2025.
Rithemelimi i drejtuar nga Sali Berisha tashmë ka nisur fushatën elektorale për zgjedhjet e 2025 me nënkryetarët e saj. Duket se frenat e partisë Berisha nuk ja besoj as Flamur Nokës dhe as Luçiano Boçit. I pari që përballet me qytetarët dhe demokratët është Gazmend Bardhi si dhe Agron Gjekmarkaj. Ndërsa të besuarit që themeluan Rithemelimin janë në më të tërhequr. Në dukje Bardhi ka marrë kompetencat e një lideri. Dje, Sekretari i Përgjithshëm PD, Flamur Noka i shoqëruar nga nënkryetarët e PD, Gazment Bardhi, Agron Gjekmarkaj, dhe anëtari i kryesisë së PD, Belind Këlliçi, kanë zhvilluar një takim me demokratët e Pukës dhe Fushë Arrëzit. Në fjalën e tij Gazment Bardhi u shpreh se PD është e vetmja mënyrë që Shqipëria të ndryshojë dhe të dalë nga mjerimi ku është zhytur në 12 vite keqqeverisje. Ai shtoi se kjo qeveri në vend që të rriste pensionet, paratë e mbledhura nga rritja e pagës minimale, i çoi për projektin e Portit të Durrësit. “Jemi sot të gjithë bashkë, të bashkuar. Jemi bashkuar, jemi të vendosur për të rezistuam, për tu përballur e për të fituar në të gjithë Shqipërinë. Jo sepse PD duhet të jetë në pushtet por se është e vetmja mundësi që Shqipëria të ndryshojë dhe të dalë nga mjerimi ku është zhytur në 12 vite keqqeverisje. Sot vendi po braktiset për shkak të pamundësisë. Kemi propozuar rritjen e pensioneve. Nga rritja e rrogës minimale në fondin e pensionet shkuan 70-80 mln euro më shumë. Në vend të rrisnin pensionet i cuan tek Porti i Durrësit, në projektin për portin. U zgjuan një mëngjes dhe thanë pse mos ta falim këtë port. Kjo është filozofia e Ramës”, tha Bardhi.
Noka: Kur bashkohemi, triumfojmë
Sekretari i Përgjithshëm PD, Flamur Noka i shoqëruar nga nënkryetarët e PD, Gazment Bardhi, Agron Gjekmarkaj, dhe anëtari i kryesisë së PD, Belind Këlliçi, kanë zhvilluar një takim me demokratët e Pukës dhe Fushë Arrëzit. Noka në fjalën e tij u shpreh se arsyeja se përse zgjodhën 22 marsin si ditën për të vizituar Pukën është sepse kjo është dita që shqiptarët të bashkuar ia dolën të triumfojmë mbi të keqen e komunizmit. “Zgjodhëm 22 marsin sepse është dita që shqiptarët të bashkuar ia dolën të triumfojnë mbi të keqen e Komunizmit. Kur bashkohemi ne triumfojmë dhe fitojmë”, tha ai. Noka foli edhe në lidhej me situatën e vështirë në të cilët ndodhet sot bujqësia në vend, të cilën ia faturoi nismës “Ballkani i Hapur”. “Bujqësia sot jep shpirt sepse Ballkani i Hapur e zhvendos vëmendjen nga produktet e eksportit nga Serbia e Vuçiçit”, tha ai.
Gjekmarkaj: Mos ju nënshtroni zarfit
Nënkryetari i PD-së së Rithemelimit, Agron Gjekmarkaj, duke folur nga Fushë-Arrëzi, deklaroi se fitorja e Partisë Demokratike në këtë bashki është një shembull për të gjithë vendin. Gjekmarkaj theksoi se qytetarët në Fushë Arrëz nuk iu nënshtruan zarfit, por zgjodhën lirinë e demokracinë. Gjekmarkaj tha më tej se bashkimi i demokratëve ka tmerruar Edi Ramën dhe të gjithë autokratët, që kanë 12 vite që keqqeverisin Shqipërinë. “Fitorja juaj është shembull sesi përbuzet zarfi. Të gjithë duhet të marrin shembull nga ju sesi ndërtohet fitorja. Ne realizuam bashkimin, që ka tmerruar kryeministrin Edi Rama dhe autokratët, që kanë qeverisur Shqipërinë për mbi 10 vite. Vendi ynë keqqeveriset, ku ka përbuzje ndaj qytetarëve. PD është partia që solli infrastrukturën, është partia që i ka dhënë identitetin europian Shqipërisë. Motoja “E duam Shqipërinë si gjithë Europa” është sot më e vlefshme se kurrë”, u shpreh Gjekmarkaj.
Të hënën mblidhen komisionet hetimore
Caktohet data se kur do të jetë mbledhja e parë e “Komisionit Hetimor të Kuvendit për Shërbimin Publik të Sterilizimit dhe Shërbimit Publik të Check-Up në Shëndetësi”. Kryetarja e komisionit Albana Vokshi informon se mbledhja e parë do të zhvillohet ditën e hënë, datë 25 mars 2024, ora 11.00 në Kryesinë e Kuvendit. “Pas miratimit në Seancën Plenare të Kuvendit, datë 21.03.2021, bazuar në ligjin “Për Organizimi dhe Funksionimin e Komisioneve Hetimore të Kuvendit”, mbledhja e parë e “Komisionit Hetimor të Kuvendit për Shërbimin Publik të Sterilizimit dhe Shërbimit Publik të Check-Up në Shëndetësi” do të zhvillohet ditën e hënë, datë 25 mars 2024, ora 11.00 në Kryesinë e Kuvendit” thuhet në vendimin e kryetares Vokshi./e.t
