Gazetarët kanë notuar të shtunën në 10 plazhe Brighton nëpër botë, për të shënuar njëvjetorin e burgosjes së gazetarit amerikan Evan Gershkovich në Rusi.
Gershkovich, gazetar i gazetës amerikane Wall Street Journal, është ndaluar në mars të vitit të kaluar sa ka qenë në Rusi për angazhime të punës, dhe është akuzuar për spiunim, akuza që mediumi ku punon dhe Qeveria amerikane i kanë hedhur poshtë.
Noti i së shtunës nëpër plazhe të ndryshme në botë ka qenjë shenjë solidariteti dhe ky aktivitet është përzgjedhur për shkak të dashurisë së Gershkovichit për plazhit Brighton në Britani dhe Nju Jork.
Gershkovich është shpërngulur më 2017 në Rusi për të punuar si korrespodent prej këtij shteti, fillimisht për gazetën Moscow Times, dhe AFP, e më pas për gazetën amerikane Wall Street Journal.
Ky 32-vjeçar më pas është shpërngulur në Londër, pas nisjes së luftës së Rusisë në Ukrainë, mirëpo është kthyer sërish në disa raste, për shkak të nevojës për raportime.
Kolegët e tij kanë thënë se “Evan është ndër personat më të mirë që do të mund të takoni dhe fakti që është në burgun rus për një vit, vetëm pse e ka bërë punën e vet, është trishtuese”.
Ata kanë thënë se kanë notuar për të shtuar vëmendjen në padrejtësinë që po përjeton ai dhe për t’ia bërë me dije se nuk është harruar.
Redaktorët e Wall Street Journal kanë thënë se përvjetori nxit zemërim dhe se gazeta do t’i rrisë përpjekjet për ta liruar Gershkovichin./kb
