Jorgo Goro është arrestuar për llogari të SPAK për “shpërdorim detyre”, duke shënuar në historinë e sistemit të drejtësisë, dy kryebashkiakë nga e njëjta bashki pas hekurave brenda një viti. Jorgo Goro i cili kishte thyer rekordet me mandatet e tij, që prej ditës së shtunë është pas hekurave së bashku me atë që do të ishte pasardhësi i tij, Fredi Beleri. Paradoksalisht Beleri që u arrestua dy ditë para zgjedhjeve për akuzën e “Korrupsionit në blerjen e votave” denoncoi Jorgo Goron i cili edhe pse humbi përballë Belerit vijoi ta mbajë detyrën deri të shtunën e kaluar kur u arrestua me kërkesë të Prokurorisë Speciale. Edhe pse të dy në burg, arrestimet janë kryer për vepra të ndryshme penale. Kryebashkiaku i Partisë Socialiste është njohur me akuzat për shpërdorim detyre në lidhje me pronën ku Artan Gaci, ish-deputeti socialist dhe bashkëshorti i ish-ministres së Jashtme Olta Xhaçka do ndërtonte një resort turistik si “investitor strategjik”. SPAK e akuzon Goron se ka shpërdoruar detyrën në dy episode, në të parin duke shmangur Këshillin e Qarkut, për sipërfaqen prej 5512 metra katrorë tokë dhe mbi bazën e dokumentit të tij toka u regjistrua në kadastër në kundërshtim me ligjin dhe më pas iu shit nga Stavri Mëhilli ish-deputetit Gaci, me një vlerë relativisht të ulët krahasimisht me tregun. Stavri Mëhilli e kishte siguruar pronën përmes dokumenteve false e për këtë, ai është shpallur në kërkim, pasi ndaj tij është caktuar masa e sigurisë “arrest me burg”. Kryebashhkiaku në detyrë i Himarës akuzohet edhe për sipërfaqen prej 5080 metra katrorë që po ashtu në finale ka kaluar në duart e bashkëshortit të Olta Xhackës. Në lidhje me këtë sipërfaqe, ai e ka kaluar përgjegjësinë tek Drejtoria e Menaxhimit në tokës. Goro ka deklaruar para prokurorëve, se thjesht ka firmosur kthim përgjigjen si titullar institucioni drejtuar Kadastrës së Vlorës pas përpilimit të dokumentacionit nga drejtoria përkatëse. Por sipas SPAK Goro në bashkëpunim me Jerasimo Bashin, në atë kohë drejtori i Mbrojtjes dhe Menaxhimit të Tokës, pa kryer verifikime kanë përcjellë dokumente të falsifikuara pranë organeve kompetente dhe mbi bazën e tyre, ka bërë të mundur regjistrimin e sipërfaqes prej 5512 m2 tokë bujqësore pronësi shtet në favor të subjektit “Pribta”. Prokuroria thotë më tej së ka kryer veprime faktike në terren të sipërfaqes së tokës bujqësore prej 5080 metra katrorë duke ja mbivendosur atë një pasurie toke shtet. Goro pritet të dalë për masë sigurie në Gjykatën e Posaçme të martën. Bashkë me të do të njihen me masat edhe Vezir Gjikoka dhe Bilbil Aliaj. Jerasimo Bashi dhe Stavri Mëhilli nuk janë gjetur ende nga policia, ndaj masat e sigurisë për ta, nuk janë ekzekutuar. Ai shprehet se ka dhënë vetëm një mendim se ku mund të jetë prona e shtetasit Haris Runa dhe Krenar Adili, me qëllim zgjidhjen e konfliktit. “I pyetur në cilësinë e personit që ka dijeni për veprën penale, shtetasi Jorgo Goro shpjegon ndër të tjera se: Në lidhje me kërkesën me nr. 19555 datë 07.09.2016, nga zyra Vendore e Regjistrimit të Pasurive të Paluajtshme Vlorë, Drejtoria e Mbrojtës dhe Menaxhimit të Tokës ka kryer veprimet e saj për të cilat ai nuk është në dijeni, por thjesht ka firmosur kthim përgjigjen si titullar institucioni drejtuar Z. V. R.PP. Vlorë, pas përpilimit nga drejtoria përkatëse. Pra e gjitha procedura e ndjekur për rastin në fjalë është trajtuar nga drejtoria përkatëse e cila ka kryer verifikimet përkatëse, dhe nga Bashkia Himarë është kthyer përgjigje me shkresë nr.2751/1 datë 13.09.2016. I pyetur se çfarë baze ligjore kishte shërbyer për të si kryetar bashkie, për të konturuar pasurinë me numër 36/35, deklaruesi është përgjigjur se ka ndërhyrë për të zgjidhur mosmarrëveshjet mes shtetasve. Kjo kompetencë, sipas deklaruesit, parashikohet në ligjin e vetëqeverisjes vendore dhe konkretisht në nenin 29 pika 3 të ligjit me nr. 139 vitit 2015, i ndryshuar me ligjin nr. 38/2019, datë 20.06.2019, i cili parashikon se në fushën e sigurisë publike, bashkitë janë përgjegjëse për garantimin e marrëdhënieve në komunitet, parandalimin dhe ndërmjetësimin për zgjidhjen e konflikteve në komunitet”, thuhet në dosje.
Çfarë do të ndodhë me Himarën
Në këtë situatë kur edhe kryetari i bashkisë edhe i zgjuri është në burg, çfarë mund të ndodh? Zgjidhja më e mirë do të ishte ajo e zgjedhjeve të parakohshme, por për këtë do të duhet të pritur një vendim i formës së prerë nga Apeli i GJKKO për Fredi Belerin. Deri atëherë Jorgo Goro, edhe pse në burg, mbetet kryetar në detyrë i Bashkisë Himarë, ndërsa situatën do të mund ta ndryshonte një dorëheqje e Goros ose nëse Qeveria vendos shkarkimin e tij. Nëse do të kishim një vendim të tillë i cili të mos ankimohej në Kushtetuese nga Goro, atëherë pozicioni i kryebashkiakut në Himarë do të mbetej edhe ligjërisht vakant. Propozimi për shkarkim mund ta vijë edhe nga Prefekti i Vlorës, Vangjel Tavo, i emëruar nga qeveria vetëm pak më parë dhe i përmendur gjerësisht si një emër i mundshëm për të kandiduar për Bashkinë e Himarës. Kjo do t’i jepte të drejtën Këshillit Bashkiak që bazuar në pikën 5 të nenit 61 të ligjit për vetëqeverisjen vendore të komandonte si kryetar në detyrë të Bashkisë, përkohësisht një prej zëvendëskryetarëve të Bashkisë Himarë. Në këtë rast Partia Socialiste ka 13 vota në Këshill, përkundrejt 8 vota të koalicionit opozitar, pra mazhoranca do të zgjidhte e vetme. “Me përfundimin para kohe të mandatit të kryetarit të bashkisë, sipas këtij neni, deri në zgjedhjen e kryetarit të ri, funksionet e tij i kryen Zv. kryetari i bashkisë. Në rastet kur ka më shumë se një zëvendëskryetar bashkie, këshilli përkatës, me shumicën e votave të numrit të përgjithshëm të anëtarëve të tij, cakton një nga zëvendëskryetarët të kryejë funksionet e kryetarit deri në zgjedhjen e kryetarit të ri”, thuhet në Neni 61, pika 5. Që prej ditës së shtunë kur u prangos, 23 mars, ai është transferuar në bllokun e sigurisë në Tiranë, nga ku do të shoqërohet për t’u dërguar në gjykatë për verifikim të masës së sigurisë. Kryebashkiaku i zgjedhur i Himarës, Fredi Beleri, ndodhet në burg që prej 12 majit 2023, ndërsa Gjykata e Posaçme vendosi më 5 mars dënimin me dy vite burg për të si i shpallur fajtor për blerje votash.
