Ministri i Brendshëm, Taulant Balla, pas përfundimit të mbledhjes së qeverisë, ka deklaruar se do të shtohen shërbimet “online” në sistemin e Gjendjes Civile.
Balla u shpreh se ndryshimet për ligjin e sistemit të Gjendjes Civile do të votohen së shpejti në Kuvend.
Më tej Balla bëri me dije se shërbimet “online” u kanë kursyer shqiptarëve 13.2 milionë euro.
“Kam komunikuar ndryshimet që bëmë dhe shumë shpejt do ta mbrojmë dhe miratojmë në Kuvend ligjin për ndryshimin e sistemit të adresave.
Çohet në një nivel tjetër digjitalizimin për shërbimet ‘online’.
Gjatë 2 viteve të fundit nga zyrat e Gjendjes Civile janë dhënë 11.3 milionë certifikata digjitale, e përkthyer në vlerë financiare, kursyer nga xhepat e qytetarëve shqiptarë, vetëm vlera e tyre si shërbim shkon në 13.2 milionë euro. Pa llogaritur kohën e humbur.
Ky revolucion digjital i ndodhur në shërbime ka sjellë kursim të parave nga xhepat e qytetarëve shqiptarë. Kjo është arritja e parë”, tha Balla.
Ndërkohë u bëri thirrje qytetarëve të deklarojnë vendbanimin.
“I drejtohem me përulje çdo qytetari që të deklarojë vendbanimin dhe qëndrimin. Është detyrim ligjor të njoftojë vendin ku banon apo qëndron”, tha ai./O.S
