Këshilltarët bashkiakë të PS-së bashkuan votat me ata të opozitës për të komanduar në detyrë Blerina Balën, kryetaren e përkohshme e Himarës. Pak para mbledhjes pati përplasje të forta nga mbështetës të Fredi Belerit, por vendimi u mor larg pritshmërive. Përveç votave të këshilltarëve socialiste, iu bashkuan edhe katër vota nga opozita, përfaqësues të Partisë së Lirisë, PD-së, Rithemelimit dhe LZHK-së.
Një javë pas arrestimit të Jorgo Goros, kryetarit humbës në detyrë, Himara dje njohur “kryetaren e përkohëshme”. Mes përplasjeve dhe akuzave Blerina Bala që mbante postin e nënkryetares së Bashkisë Himarë u zgjodh kryetare e përkohëshme, deri në zgjedhjet e reja.
Me shumicë të votave të këshillit bashkiak të Himarës, u caktua nënkryetarja Blerina Bala të ushtrojë detyrat e kryebashkiakes së Himarës deri në zgjidhjen e problematikës që ka mbërthyer postin e kryetarit të kësaj bashkie, pas arrestimit të kryetarit të zgjedhur më 14 maj Fredi Belerit për korrupsion zgjedhor dhe, 10 muaj më pas, edhe të kryetarit që ishte në detyrë, Jorgo Goros për çështje pronësie. Këshilli ka nga totali prej 15 votash pro Balës, 9 janë nga anëtarët e PS në këshill, 6 nga subjektet e tjera politike përfshirë nga radhët e opozitës. 6 anëtarë nuk morën pjesën në votim.
Pas zgjedhjes, kryetarja e komanduar nuk preferoi të prononcohet për mediat, por shpërndau mesazhin e saj në mënyrë elektronike. Zgjedhja e Blerina Balës u parapri nga tensione të mbështetësve të kryetarit të zgjedhur Fredi Belerit, të cilët kanë refuzuar praninë në sallën e mbledhjes të prefektit të Vlorës Vangjel Tavo, dhe drejtuesit politik të PS Blendi Klosi.
Për shkak të këtyre kundërshtive mbledhja u spostua në ambientet e godinës së Bashkisë, ku u realizua edhe procedura e zgjedhjes. Përkrahës të kryetarit të zgjedhur të bashksisë së Himarës, Fredi Beleri e cilësuan farsë komandimin e Blerina Balës në krye të bashkisë.
Ndërsa për prefektin e Vlorës, ata persona që shfaqën kundërshti dhe nuk lejuan zhvillimin normal te mbledhjes janë një pakicë dhe se qëllimi i kësaj procedure është që të fillojë sa më shpejt puna për trajtimin e problemeve të himariotëve përfshire dhe ata që kundërshtuan. Prefekt i Vlorës Tavo ka deklaruar gjithashtu se ka nisur puna së bashku me kadastrën për pajisjen e himariotëve me titujt e pronësisë.
Reagimi i Ramës
Kryeministri Edi Rama e ka cilësuar një zhvillim pozitiv zgjedhjen e Blerina Balajt, si kryetare e komanduar e Bashkisë Himarë, deri në mbajtjen e zgjedhjeve të reja për këtë bashki.
Sipas kreut të qeverisë, me votimin e sotëm, 15 pro Balajt dhe 4 kundër, himariotët treguan se nuk duan konfliktin dhe përçarjen, që sipas tij, ushqehet nga “interesa që s’kanë lidhje me interesat legjitime të popullit të Himarës”.
“Zgjedhja e sotme nga Këshilli Bashkiak të Himarës, me 15 vota pro dhe vetëm 4 kundër, e nënkryetares së bashkisë, Blerina Bala, si kryetare në detyrë është një zhvillim pozitiv për vazhdimin e punës së qeverisë vendore.
Përpjekja e dështuar e një grushti individësh të nxitur për ta penguar këtë zhvillim të bazuar në detyrimin përkatës ligjor të Këshillit Bashkiak, tregoi qartë faktin e thjeshtë se shumica e madhe e himariotëve nuk i përkasin llogores së konfliktit, përçarjes dhe amplifikimit absurd të një sherri primitiv, i cili ushqehet për interesa dhe hesape që s’kanë asnjë lidhje me interesat legjitime të popullit të Himarës”, shkruan Rama.
Pas 10 muajsh me kryetar në detyrë, tashmë bashkia e Himarës ka një kryetare të komanduar.
Përplasja
Mbledhja e Këshillit Bashkiak nisi në orën 10:00 ku të pranishëm ishte dhe prefekti i Vlorës, Vangjel Tavo, drejtuesi politik i qarkut të Vlorës Blendi Klosi dhe kryetari i Këshillit të Qarkut Ervis Moçka. Mbështetësit e kryebashkiakut të zgjedhur Fredi Beleri, i cili është në burg për blerje votash hynë në bashki dhe refuzuan praninë e Vangjel Tavo. Me thirrje greqisht e shqip ata ofenduan zyrtarin, i cili ishte në mbledhje, si një e drejtë që ia jep ligji.
Të ‘shitur’ e quajtën nacionalistët e Belerit Prefektin Tavo, i cili vjen nga minoritet grek, ndërsa sipas tyre ai po vjen vjedhur pronat e Himarës.
Në greqisht i kërkon dhe të dilte jashtë. Gjatë gjithë tensioneve është dashur ndërhyrja e policisë për të ruajtur sigurinë, ndërsa në fund, për të qetësuar situatën Tavo, Klosi dhe Ervis Moçka dolën nga mbledhja.
Teksa po largohej një mbështetës i Belerit e pështyu Tavon në fytyrë. Skena e rënda solli shtyrjen e mbledhjes për një orë. Këshilltarët u mblodhën sërish në orën 12:00, pa praninë e mbështetësve të Belerit, po në ambientet e Bashkisë së Himarës, por jo më në sallën e mbledhjeve të Këshillit Bashkiak.
Reagimi i Belerit
Kryetari i zgjedhur dhe i dënuar i Bashkisë së Himarës, Fredi Beleri reagoi ashpër në rrjetet sociale pas zhvillimeve të fundit në bashki, ku mbledhja e këshillit në qytetin bregdetar zgjodhi si kryetare të komanduar Blerina Balën, në një proces që u shoqërua me tensione në nisje të tij.
Beleri i cilëson të gjitha zhvillimet si në shkelje të Kushtetutës, teksa nuk kursen kritikat as ndaj prefektit Tavo, i cili sipas tij filloi fushatën elektorale duke premtuar tituj pronësie. Në fokusin e reagimit të Belerit nga burgu ishte dhe kryetarja e komanduar Balaj, për të cilën ai thotë se nuk është as anëtare e këshillit, por është emëruar nga Jorgo Goro.
Për Belerin, zgjidhja e vetme është betimi i tij. “Asnjë ligj dhe asnjë nen i Kushtetutës nuk e parashikon këtë që po ndodh në Bashkinë Himarë. Neni 61 i ligjit 139/2015 që trumbeton prefekti nuk zgjidh ndërprerjen e parakohshme të një mandati të mbaruar me kohë.
Asnjë praktikë e mirë evropiane, të cilave z. Rama iu referua, nuk thotë se kryetari i bashkisë caktohet nga partia humbëse e zgjedhjeve për kryetar bashkie. Asnjë praktikë e mirë evropiane nuk parashikon të caktohet nga prefekti si kryetar bashkie një person që nuk është zgjedhur as këshilltar bashkiak, por është emëruar nga humbësi”, shkruan Beleri. Ai tha se është shkelur kushtetuta.
“Shkelët Kushtetën dhe atë që u votua nga sovrani nuk e lejuat të betohet. Në kundërshtim me ligjin, caktoni një kryetar të ri bashkie, siç edhe Prefekti e deklaroi, dhe e interpretoni ligjin ashtu siç ju intereson. Juve nuk ju intereson ligji, por ju intereson vetëm të mos betohet, qoftë edhe për një orë të vetme, ai që u zgjodh kryetar bashkie konform Nenit 109 të Kushtetutës. Për ju, ligji është thjesht një copë letër bakalli.
Me gjasë, letër bakalli është edhe për z. Tavo, i cili në kundërshtim me ligjin, dje u tregoi këshilltarëve si të mendonin, sot mori pjesë në mbledhjen e këshillit bashkiak për t`u siguruar që e kishin kuptuar drejt urdhërin e tij.
Pa patur asnjë kompetencë, filloi sot fjalimet elektorale duke premtuar tituj pronësie”, shkruan ai.
