Kryebashkiaku Erion Veliaj i është bashkuar mbledhjes online të Këshillit Bashkiak, ku nuk kurseu komentet për protestën dhe sulmet e Rithemelimit.
“Pata një mundësi të jashtëzakonshme për të treguar punën e bashkisë me dy kolegët, Pashë një organizatë të mençur, të stabilizuar. Këta çapaçulët me molotov që janë imitim i dobët i ultrasve të futbollit nuk kanë vend në Tiranë. Guri, zjarri, litari mungesa e respektit dhe dhembshurisë nuk kanë vend në Tiranë. Ftesa ime për këta është të shkojnë nga humbja në humbje pa e humbur entuziazmin. Humbjet e tyre nuk do ndalen. Ai që humbi me 60 mijë vota, më keq se Lul Basha, ka qenë drejtor këtu dhe nuk është shquar për ndonjë gjë bashkia atëherë”, u shpreh ai.
“Jo vetëm që nuk dorëzohem, por do të punoj më fort”, tha Veliaj në përgjigje të protestave të Rithemelimit që udhëhiqen nga vajza e Berishës në arrest shtëpie.
“Ftesa ime për ta është: shkoni nga humbja në humbje pa e humbur entuziazmin. Ata nuk kanë asnjë ide për ta çuar vendin përpara. Ai që humbi me 60 mijë vota më keq se Lul Basha te bashkia e vogël ka qenë drejtor në këtë bashki. Ja ku jam sot, le të rrinë lepujt ditën e natën, nga bashkia e Tiranës nuk na heq askush përveç popullit. Ata që janë frikacakë nuk shkojnë në SPAK. Rusvelt thoshte, mos na gjykoni vetëm për punët që kemi bërë por edhe për armiqtë. Kemi sot një vlerësim spektakolar nga turizmi botëror. 365 ditë turizëm. Sot sheshi është plot me turistë. Ata nuk mbledhin dot më shumë se turistët… Sjellja e tyre kafshërore… unë jo vetëm që nuk dorëzohem por do punoj edhe më fort.”
Teksa inkurajoi SPAK për punën, Veliaj tha se vetëm duke sqaruar gjërat dhe njerëzit mund të ecet përpara.
“Unë dua të inkurajoj Dumanin skuadrën e tij ecni vetëm përpara. Vetëm duke i sqaruar gjërat dhe vetëm duke ecur përpara mund ta sqarojmë kombin. Nëse janë burra këta që bërtasin përditë le të zbresin nga nga ballkoni i Berishës e të shkojë në spak. E kemi mbledhur të gjithë llumin bashkë. Kemi bashkuar kundër nesh të gjithë llumin. Secili analist ka kërkuar diçka nga bashkia e Tiranës… Prandaj vlerësohet Tirana edhe në Kosovë. Asnjë të mos ketë asnjë iluzion, secili prej maskarenjve aty ka hallin e vetë. Unë llogarinë e kam vetëm me qytetarët e Tiranës. Jam krenar për punën dhe krenar për të gjithë llumin e bashkuar kundër nesh. Fundërrinat e këtij qyteti janë bashkuar.”
