Barcelona është në kërkim të një mesfushori apo “pivote”, siç quhet në Spanjë ky rol për mesfushën. Media sportive spanjolle, kryesisht gazetat pranë klubit “blaugrana”, shkruajnë se italiani Marco Verratti i është ofruar Xavi Hernandezit.
Ish-lojtari i Paris SG shkoi në Katar verën e kaluar për të luajtur për Al-Arabin, por tani dëshiron të kthehet në Evropë dhe për ta bërë këtë ai është i gatshëm të ulë ndjeshëm pagën e tij.
Barcelona po mendon për këtë, sepse Verratti është një obsesion i vjetër i drejtuesve, të cilët tentuan ta blinin verën e kaluar, duke marrë një refuzim të ashpër nga PSG.
Tashmë Barcelona e ka këtë mundësi, por klubi nga kryeqendra e Katalunjës ka si opsion edhe Kimmich të Bayernit dhe Zubimendin e Real Sociedadit.
Dyshimet për Verratin, që ka avantazh përvojën e tij të madhe, lidhen me mungesën e mundshme të ritmit pas një viti të kaluar në një kampionat me konkurrencë të dobët si ai i Katarit.
Ndërkohë, “El Mundo Deportivo” ka nisur një sondazh për lojtarin e preferuar të tifozëve për këtë rol dhe Verratti zë vendin e fundit. Vetëm 6% e mbështetësve të Barcelonës e duan italianin me fanellën “blaugrana”.