Max Verstappen nuk shkoi më shumë se vendi i dytë në Çmimin e Madh të Miamit, duke iu dorëzuar McLarenit të Lando Norris. Holandezi, pati disa probleme me RedBullin e tij ndërsa pas garës e pranoi se kundërshtari i tij ishte më i shpejtë. Megjithatë, tre herë Kampioni i Botës theksoi se ndodh që edhe skuderia e tij apo ai vetë të jetë në një ditë të keqe.
“Në Formula 1 herë fiton dhe herë të tjera humbet, ne jemi mësuar me këtë sport. Kështu ndodh në gara apo jo? Ishte një ditë jo edhe aq e mirë, nuk ndjehesha në rehati me gomat e mesme. Po fitonim kohë, por jo ashtu siç unë dëshiroja. Pastaj u futa në “pit-stop” dhe mësova se McLaren po regjistronte kohë shumë të shpejta.
Ata më pas kaluan te gomat e forta dhe u bënë edhe më të shpejtë, veçanërisht Norris, ai po “fluturonte”. Ishte pak e vështirë për ne, por nëse një ditë e keqe përkthehet me vendin e dytë, atëherë nuk ka problem. Nga ana tjetër, jam shumë i lumtur për Norris, kishte kohë që ishte bërë fati për të fituar.
Jam i bindur se kjo nuk do të jetë fitorja e tij e vetme. Ai e meritoi plotësisht triumfin në Miami. Pashë që McLaren kishte punuar mirë, ndaj ne duhet të bëjmë më shumë nga tani e në vazhdim. Nuk ishte fundjava jonë sa i takon ritmit, pasi nuk kishim atë të duhurin, por do ta analizojmë dhe do të rikthehemi më të fortë”, u shpreh Verstappen.
Sa i takon kalendarit, gara e radhës në Formula 1 është ajo në Emilia Romagna në fundjavën e 17-19 maj.