Pasagjerët dhe anëtarët e ekuipazhit të fluturimit SQ321 të Singapore Airlines mbërritën sot në Singapor, një ditë pasi avioni që fluturonte nga Londra përjetoi ” turbulenca ekstreme dhe të papritura duke shkaktuar një të vdekur dhe disa të plagosur.
Avioni bëri një ulje emergjente në Bangkok, ndërsa shefi ekzekutiv i linjës ajrore kërkoi falje. Ngjarja ndodhi dje dhjetë orë pas ngritjes së avionit Boeing 777, teksa fluturonte në një lartësi prej 11 mijë metrash mbi Mianmar.
Sipas një pasagjeri, personat brenda kabinës uu përplasën në tavan. Dhjetëra persona kanë pësuar lëndime të rënda në kokë. Fotot nga brenda avionit tregojnë një kabinë të mbushur me ushqime, shishe dhe bagazhe, ndërsa maskat e oksigjenit varen nga tavani.
Avioni, me 211 pasagjerë dhe 18 anëtarë të ekuipazhit, bëri një ulje emergjente në aeroportin e Bangkok.
Një britanik 73-vjeçar humbi jetën, sipas spitalit të Bangkok ku u dërguan të plagosurit, 71 persona janë duke u trajtuar , duke përfshirë 6 në gjendje të rëndë. Sipas aeroportit të kryeqytetit janë plagosur 83 persona.
Sot, 131 pasagjerë dhe 12 anëtarë të ekuipazhit mbërritën në një tjetër fluturim për në Singapor.
Ata u pritën nga familjarët e tyre, por askush nuk donte të fliste me gazetarët.
Kryeministri i Singaporit Lawrence Wong i shprehu ngushëllimet e tij familjes së menaxherit të teatrit britanik në Bristol, Geoff Kitchen, i cili fatkeqësisht humbi jetën.
Ndërkohë, shkencëtarët thonë se ndryshimi i klimës ka të ngjarë të shkaktojë më shumë turbulenca, të padukshme për radarët. Sipas një studimi të vitit 2023, kohëzgjatja vjetore e turbulencave u rrit me 17% midis 1979 dhe 2020, ndërsa tani janë rritur me 50%./ S.M
