iGenius, startup-i i inteligjencës artificiale i themeluar në 2016 nga emigranti shqiptar në Itali, Uljan Sharka, njoftoi të martën se po kërkon një investim me vlerë 650 milionë euro, financim i cili do ta vlerësonte kompaninë me 1.7 miliardë euro.
E njohur për modelet e saj të fundit të inteligjencës artificiale, kompania iGenius lançoi së fundmi “Italia”, një model me burim të hapur (LLM) i krijuar ekskluzivisht në gjuhën italiane dhe është në gjendje të kuptojë nuancat gjuhësore dhe kulturore.
Ky raund investimi do ta katapultonte iGenius në pozicionimin si ‘njëbrirëshi’ i startupeve më elitare të inteligjencës artificiale në skenën evropiane dhe në botë. Kompania iGenius deri më tani ka siguruar investime me vlerë 1.05 miliardë euro.
Modelet iGenius AI i japin përparësi besueshmërisë dhe sigurisë së të dhënave, duke siguruar përdorim të sigurt në mjediset e prodhimit.
iGenius krenohet me një ekip ndërkombëtar që vepron në Amerikën e Veriut dhe Evropë, me zyra në Nju Jork dhe një seli në Milano. Kompania po investon qindra milionë euro për të ndërtuar modele të inteligjencës artificiale që organizatat mund t’i besojnë dhe t’i adoptojnë në shkallë.
‘Sot, ne bëjmë një hap gjigant përpara me kapital shtesë për të nxitur përparimet tona të AI në sektorë të rregulluar. Qëllimi ynë është t’i bëjmë të dhënat njerëzore, të ripërcaktojmë të ardhmen e punës dhe të mbyllim hendekun e aftësive, duke fuqizuar individët dhe bizneset për të arritur në lartësi të reja.’ tha Uljan Sharka, CEO iGenius.
Kompania beson se modelet e centralizuara dhe të mbyllura të Inteligjencës Artificiale nuk mund të jenë të pajtueshme me sektorë të rregulluar si financat ose qeverisja. Sektorë të tillë si financat dhe administrata publike kërkojnë kontroll rigoroz të të dhënave për të qenë në përputhje me rregulloret aktuale dhe për t’u mbrojtur nga shkeljet./E.T
