Sezoni turistik veror ka bërë bashkë Policinë e Shtetit dhe Policinë e Kosovës, të cilat do të patrullojnë së bashku për të garantuar sigurinë e qytetarëve që kanë zgjedhur të vizitojnë vendin tonë gjatë stinës së verës.
Për këtë qëllim, drejtori i Policisë Rrugore, Altin Qato priti në Morinë homologun e Kosovës, Jeton Rexhepi dhe trupat e para të Policisë Rrugore të Kosovës, që do patrullojnë me kolegët shqiptar, në Rrugën e Kombit, në Lezhë, Shëngjin dhe Durrës.
Sipas Qatos, menaxhimi i trafikut dhe rritja e parametrave të sigurisë janë disa nga pikat kyçe ku do të fokusohet patrullimi.
“Jemi këtu së bashku me kolegun zotin Rexhepi, drejtor i Policisë Rrugore të Kosovës, pasi ndërmjet 2 drejtorëve të përgjithshëm të policive është bërë 1 marrëveshje bashkëpunimi për patrullime të përbashkëta gjatë sezonit turistik. Sot është dita e parë që fillojmë patrullimet, kështu që jemi duke prezantuar shërbimet e përbashkëta, të cilat do të patrullojnë në akset rrugore të rrugës të Rrugës së Kombit, territorin e Lezhës dhe të Durrësit, ku është fluks i madh i qytetarëve kosovarë që frekuentojnë Shqipërinë, qoftë gjatë sezonit turistik që është një numër më i konsiderueshëm, por edhe gjatë gjithë vitit. Shërbimi do të konsistojë kryesisht në rritjen e parametrave të sigurisë, po dhe për menaxhimin e trafikut, pasi në këtë periudhë, siç e përmenda më parë, ka një fluks të jashtëzakonshëm të qytetarëve nga Kosova që frekuentojnë zonat turistike të Shëngjinit, Velipojës dhe Durrësit, prandaj dhe është menduar që këto akse rrugore do të patrullohen nga patrulla të përbashkëta. Përveç se do ndikojmë bashkërisht në rritjen e parametrave të sigurisë dhe menaxhimin e trafikut, kjo do shërbejë më së miri për të dyja shërbimet tona dhe për shkëmbimin e përvojave, për komunikimin dhe për një njohje më të plotë të metodave dhe praktikave të punës”, tha ai.
Nga ana tjetër, drejtori i policisë së Kosovës, Jeton Rexhepi tha se Policia e Kosovës ndër vite ka ofruar mbështetje sidomos gjatë sezonit turistik.
“Periudha e sezonit turistik veror që përkon me këtë periudhë kryesisht korriku gushti, është një periudhë shumë e ngarkuar për Policinë Rrugore, pasi kemi një fluks të jashtëzakonshëm mjetesh. Sipas analizës që kemi bërë ne si polici rrugore janë rreth 1 200 000-1 300 000 mjete qarkullojnë në akset rrugore, kryesisht në akset që lidhin me zonat turistike, kështu që ka nevojë për një menaxhim më të mirë nga shërbimet e Policisë Rrugore së pari për rrugë të sigurta dhe së dyti për menaxhimin e trafikut aty ku kemi ne pengesa që për shkak të fluksit të madh të mjeteve, krijojnë radhë të gjata në trafik, ka momente dhe bllokime.
Prandaj si detyrë parësore ne kemi sigurinë, por një rol të veçantë merr dhe menaxhimi i trafikut për të shmangur bllokimet në akset rrugore. Për këtë ne kemi bërë një plan të detajuar. Kemi bërë një detajim të të gjithë shërbimeve dhe të gjithë pikave kryesore ku janë problematikat, qofshin këto njolla të zeza që janë për aksidente rrugore dhe njollat e kuqe ku kemi rëndesë trafiku. Shërbimet e Kosovës bashkë me shërbimet tona do konsistojnë kryesisht në këto njolla, ku dhe prezenca e Policisë do jetë me e dukshme”, u shpreh Rexhepi.
Përmes një memorandumi bashkpunimi të nënshkruar në 8 qershor, policit e dy vendeve kanë rënë dakord të organizojnë shërbime të përbashkëta të policimit rrugor në territorin e vendit tonë gjatë periudhës qershor-shtator 2024./ S.M
