Ish-kreu i PD-së Lulzim Basha ka reaguar në lidhje me skandalin e Onkologjikut, ku mjekët bënin pazar me jetën e pacientëve. Sipas tij, shëndetësia jo vetëm që nuk u bë falas, por piramida që ka ngritur Rama nuk kursen as të sëmurët dhe as ata që luftojnë me vdekjen.
Deputeti Lulzim Basha, ka mbajtur një qëndrim për vizitën e kryeministrit Edi Rama në pavionin e Onkologjikut. Ai e ka quajtur takimin e tij si kthim në vendin e krimit. Basha ka kërkuar luftë ndaj korrupsionit dhe SPAK të hetojë këtë skandal dhe jo vetëm. “Së pari gjithçka duhet të nisë me luftë pa kompromis kundër korrupsionit. Inkurajoj SPAK të ecë përpara me vendosmëri në luftën e korrupsionit, kudo që ai shpërfaqet dhe në çdo nivel të pushtetit”, është shprehut Basha. Me anë të një postimi në Facebook, Basha thotë se kryeTixhja e pandemisë me tenderat sekretë është maja e piramidës së korrupsionit. “Me propagandën e tij bajate, u përpoq të lajë duart me përgjegjësitë, për t’ia lënë ato vetëm mjekëve. Kujtonte me paturpësinë më të madhe Tixhen, ndërkohë që kryeTixhja e pandemisë ishte vetë ai me tenderat sekretë. Me parrulla të lodhura dhe kundërthënëse, ku sipas interesit të tij një herë e ka fajin individi, një herë sistemi, ndërsa koka, maja e kësaj piramide korruptive, flet sikur ka ardhur sot në pushtet”, shkruan Lulzim Basha. Ai shkruan se Rama u shfajësua siç bëri me zv. kryeministrin në arrati për korrupsion, me ministra, ish-ministra dhe ish-kryebshkiakët, me parrullën “përgjegjësia është individuale”. “Siç ka berë me zv. kryeministrin në arrati për korrupsion, me ministra, ish-ministra, kryebashkiake e ish-kryebashkiakë, edhe këtu u shfajësua me frazën “përgjegjësia është individuale””, tha ai. Në reagimin e tij, Basha gjithashtu thotë se ishte Rama që premtoi shëndetësi falas dhe sot shqiptarët paguajnë nga xhepi 60% të sherbimeve për shendetësinë. Ai sjell në vëmendje konkluzionet e OBSH se shpenzimet e shqiptarëve për shëndetësinë u rritën me 82%. “A thua se nuk është ky që u premtoi shqiptarëve shëndetësi falas, e sot shqiptarët paguajnë nga xhepi 60% të shërbimeve për shëndetësinë. Me qeverisjen e Edi Ramës, Organizata Botërore e Shëndetësisë llogarit se shpenzimet e shqiptarëve për shëndetësinë u rritën me 82 për qind. Shqipëria mban rekord për shpenzimet nga xhepi në krahasim me çdo vend tjetër në Europë. Po aq kriminale është skema korruptive e barnave, që lejon futjen në treg të ilaçeve me origjinë jo të sigurtë, me cilësi të ulët dhe pa efekt, duke mos përfshirë në listën e rimbursimit barna për sëmundjet e rënda. E si të harrojmë milionat e eurove që vidhen në tendera e koncesione korruptive, të cilave u doli zot me pafytyrësi. Miliona që do të mjaftonin për t’u ofruar qytetarëve shërbim shëndetësor cilësor për të gjithë”, tha Basha. Sipas tij, problemet e sistemit shëndetësor dhe ndalja e abuzimit kërkojnë zgjidhje urgjente, të cilat nuk mund të vijnë nga ai që ka 11 vite që abuzon me shëndetin e familjeve shqiptare. Dhe për këtë si zgjidhje Basha sheh inkurajimin e SPAK në luftën kundër korrupsionit në çdo apekt dhe alternativën e demokratëve euroatlantik që qytetarëve të mos u shkojnë dëm paratë e sigurimit shëndetësor, por të marrin sherbim në çdo spital që ofrohet shërbimi i nevojshëm. “Sot për t’u hedhur hi syve shqiptarëve ka shpikur menaxherë të huaj. Siç është dëshmuar edhe më parë, pas çdo skemë të tillë është një tjetër plan abuzimi me paratë e shqiptarëve dhe më pak shërbim për ta. Për vite me radhë paratë e shqiptarëve nuk janë vendosur në shërbim të pacientëve, por të politikanëve të korruptuar dhe klientëve të tyre. Kjo lojë e paskrupullt me shëndetin e njerëzve, është dëshmi e makutërisë primitive të kësaj qeverie, e cila duhet hetuar në thellësi, duke shkuar deri tek burimi i kësaj skeme korruptive dhe rrënuese për interesin publik, e cila nuk u ndal as gjatë kohës së vështirë të pandemisë. Prandaj rasti i Onkologjikut, që fatkeqësisht nuk është i vetmi, është një metastazë e tumorit të korrupsionit që ka instaluar kjo qeveri në sistemin e shëndetësisë. Problemet e sistemit shëndetësor dhe ndalja e abuzimit kërkojnë zgjidhje urgjente, të cilat nuk mund të vijnë nga ai që ka 11 vite që abuzon me shëndetin e familjeve shqiptare, ndërsa ata ikin dhe për shkak të sistemit shëndetësor që është pasqyrë e qeverisë më të korruptuar në Europë.”, tha Basha.
Protestuan para Onkologjikut, arrestohen dhe lirohen katër të rinj
Ndërsa kryeministri Edi Rama zhvilloi një takim me shefat e shërbimit në Onkologjik, jashtë ndërtetsës u protestua për papërgjegjshmërinë e mjekëve. Protestuesit kishin marrë një boks ku dëgjohej fjala e Kryeministrit të vitit 2013, teksa fliste për shëndetësinë falas, ndërsa njëra prej tyre tentoi t’i afrohej Kryeministrit. Vetë protestuesit thonë se katër prej tyre janë shoqëruar nga policia për në Komisariatin nr. 4 në Tiranë. “Ne kemi dënuar manualin e Bandës Onkologjikut dhe në komisariat duhet të shoqërohen ata mjekë që aplikojnë manualin në çdo repart të QSUT dhe jo të rinjtë që protestojnë kundër Bursës së vdekjeve në QSUT”, thonë protestuesit. Vetëm pak orë pas shoqërimit të rinjtë u lanë të lirë nga policia e Tiranës.
