Ish-ministri i Shëndetësisë Ilir Beqaj, është arrestuar mëngjesin e së enjtes. SPAK ka ngritur akuzën e shpërdorimit të detyrës dhe korrupsion me fondet e donatorëve. Dyshohet se Beqja ka abuzuar me fondet e Bashkimit Europian gjatë kohës që drejtonte agjencinë SASPAK. Bashkë me të procedohen penalisht edhe gjashtë bashkëpunëtorë të tjerë. Skema që kishin ngritur dhe provat e siguruara nga SPAK.
Mëngjesin e djeshëm agjentët e BKH-së të mbështetur edhe nga policia arrestuan në banësën e tij ish-ministrin e shëndetësisë Ilir Beqja. Ndalimi i tij u krye pas urdhër-arrestit të lëshuar nga Prokuroria Speciale SPAK dhe miratuar nga gjykata, Bashkë me Beqjan u proceduan edhe gjashtë persona të tjerë në masën arrest shtëpie dhe detyrim paraqitje. Ata akuzohen se në bashkëpunim me njëri-tjetrin në periudha të ndryshme kohore kanë abuzuar me fondet e donatorëve të huaj të cilat menaxhoheshin nga agjensia SASPAK që drejtohej nga Beqja. Pas dënimit të ish-ministrit të Brendshëm Sajmir Tahiri, atij të Mjedisit, Lefter Koka, Beqja është ish-ministri i tretë i qeverisa Rama 1 dhe 2 që provon prangat, ndërsa në kërkim është ish ministri i Energjitikës Arben Ahmetaj. Koka dhe Ahmetaj janë hetuar për incenaratorët, ndërsa Beqaj për vjedhjen e fondeve të Bashkimit Europian gjatë kohës që drejtonte Agjencinë Shtetërore të Programimit Strategjik dhe Koordinimit të Ndihmës. SPAK thotë së përmes njerëzve të besuar ku njëri prej tyre është Ermal Kurtulaj, drejtues i projektit Eusair, pranë Agjencisë, dyshohet se kanë përfituar shuma të mëdha parash, përmes faturave fiktive për shërbime të pakryera të lëshuara nga biznese të ndryshme në Tiranë.
Arrestimi dhe akuzat
Mëngjesin e së enjtes, SPAK arrestoi ish-ministrin e Shëndetësisë Ilir Beqajn. Ky i fundit në cilësinë e drejtorit të Përgjithshëm të Agjencisë Shtetërore të Programimit Strategjik dhe Koordinimit të Ndihmës në bashkëpunim me vartës të tij gjatë viteve 2022-2023 kanë kryer procedura prokurimi fiktive në kundërshtim me marrëveshjet e firmosura nga Shqipëria dhe Komisionit Evropian. Sipas prokurorisë së Posaçme, tenderët që janë zhvilluar me prokurim të thjeshtë, janë urdhëruar nga Ilir Beqaj. Ajo referon një prej shërbimeve që është prokuruar dy herë, një herë në vlerën prej 125.000 eurosh të prokuruar nga institucioni që drejtonte Beqaj dhe një herë nga Ministria e Turizmit dhe Mjedisit në vlerën sipas çmimit të kontratës prej 380.000 eurosh duke përfituar në të dyja rastet e njëjta kompani. Në funksion të kësaj skeme, thekson SPAK, Beqaj ka bashkëpunuar me Ermal Kurtulaj, financieri dhe bashkëpunëtori i ngushtë i tij. Sipas SPAK, restoranti “Gzona’ ndonëse ka për administrator një person tjetër, është pronë e fshehur e Beqajt. SPAK thekson se Beqaj ka investuar te restorant “Gzona” prej vitit 2019 shumat 21 411 euro dhe 4 666 110 lekë të reja për blerjen e pajisjeve dhe 34 783 euro si shpenzime qiraje. “Personi nën hetim I. B. dyshohet se ka kryer deklarim të rremë mbi pasurinë e tij nga viti 2020 e në vazhdim, pasi ka fshehur interesat pasurore të tij mbi restorantin “G…..” me adresë pranë Kalasë Tiranë, që nga krijimi e deri në vazhdim. Pavarësisht se bashkëshortja e tij ka figuruar de jure ortake në masës 15% në këtë shoqëri deri në vitin 2020 duke i dhuruar më pas kuotat e saj ortakut tjetër, ortak ka qenë në fakt vetë personi nën hetim I. B., i cili ka vijuar si i tillë edhe përgjatë kohës që drejtonte SASPAC-un”, thuhet në njoftimin e SPAK. EUSAIR, në SASPAC, përgjatë viteve 2022-2023 dyshohet se kanë kryer procedura prokurimi fiktive në kundërshtim me rregullat “PRAG” të përcaktuara në “Rregullat e Zbatimit të Rregullores Financiare”, të aplikueshme për të gjitha kontratat e ndihmës së jashtme të BE-së të financuara nga Buxheti i Përgjithshëm i BE-së dhe Fondi i 10-të Evropian i Zhvillimit(EDF). Këto tendera janë zhvilluar me procedurë negocimi konkuruese apo prokurim të thjeshtë, të cilat janë urdhëruar për t’u kryer nga personi nën hetim I. B. në cilësinë e Drejtorit të Përgjithshëm, i cili ka nënshkruar që nga rënia dakord për të kryer shërbimin e caktuar, tek ftesat që i’u janë dërguar subjekteve për të paraqitur oferta sipas llojit të prokurimit, tek urdhri për ngritjen e komisionit për të kryer vlerësimin e ofertave, tek shkresa që i është dërguar fituesit pas vlerësimit deri tek lidhja e kontratës, dokumenta këto të hartuara, plotësuara dhe nënshkruara kohë më pas, nga lidhja dhe zbatimi i kontratës. Nga ana e oficerëve të Byrosë Kombëtare të Hetimit, si dhe strukturave të Drejtorisë së Përgjithshme të Policisë së Shtetit, janë ekzekutuar deri më tani gjashtë masa sigurimi personal për personat nën hetim, ndërkohë që po kryhen veprime për ekzekutimin e masës për personin tjetër nën hetim. Gjatë hetimeve janë ushtruar kontrolle në disa banesa dhe në njërën nga zyrat e shoqërisë tregtare ku janë sekuestruar dokumente dhe blloqe me shënime, shuma parash prej afro 47. 000 euro dhe 700.000 lekë, aparate telefoni me interes për hetimin etj. Hetimet vazhdojnë në lidhje me grumbullimin dhe sigurimin e provave për persona të tjerë të përfshirë në këto veprime, si dhe për fakte të tjera penale të lidhura me kontrollet e ushtruara në datën 28 dhjetor të vitit 2023. Beqaj dha dorëheqje nga posti i drejtorit të agjencisë nëntorin e vitit të kaluar, pasi iu caktua masa e sigurisë “detyrim paraqitjeje” dhe “ndalim dalje jashtë shtetit” për shkak të hetimeve për dosjen “sterilizimi”.
