Rritje e numrit të vizitorëve për kalanë e Shkodrës, një destinacion historik-kulturor. Drejtoria Rajonale e Trashëgimisë Kulturore Shkodër shprehet se muaji që lamë pas pati rritje të numrit të vizitorëve më shumë se e njëjta periudhë e vitit të kaluar.
“Lajm i mirë për Kalanë e Shkodrës destinacion historik-kulturor. Në muajin qershor kemi mikpritur 18.078 vizitorë, që janë 4.5 për qind më shumë se e njëjta periudhë e 2023”, thuhet nga DRTK Shkodër. Kalaja e Shkodrës që mban emrin Rozafa është një monument mijëvjeçar i ngritur mbi një kodër shkëmbore në hyrje të qytetit të Shkodrës, në jug-lindje të tij. Qëndron mbi një kodër shkëmbore 130 metra mbi nivelin e detit, e rrethuar nga lumi Buna e Drin, me një sipërfaqe prej gati 9 hektarësh.
Kalaja përbën një simbol të qytetit, e pranishme ndër piktura, gdhendje, etj. Hyrjen kryesore kalaja e ka nga veri-lindja, sipërfaqja e brendshme ndahet nga muret e tre oborreve, me porta mes tyre. Oborret vijnë duke u ngritur njëri pas tjetrit, i treti është në pjesën e lartë të kodrës. Muret dalëse kanë të dalura drejtkëndore që zëvendësojnë kullat, ndërsa në murin e jashtëm kullat janë më të dendura.
Brenda kalasë ka disa ambiente që lidhen me një kullë cilindrike, një depo si dhe një godinë trekatëshe të kohëve venedikase, quajtur Kapiteneria. Oborri i dytë në pjesën qendrore ka katër depozita për grumbullim uji, katërkëndëshe të mbuluara me qemerë, prej ku merrej uji përmes grykave të puseve rrethore. Aty është depoja, burgu si dhe Xhamia e Fatihut./E.T
