Pas sondazheve të projektit të UNDP “Barometri Kombëtar i Perceptimit të Publikut rreth Policisë së Shtetit” (financuar nga një konglomerat ndërkombëtar), eksperti i sondazheve Eduard Zaloshnja i Institutit Agenda zhvilloi edhe një tjetër anketë elektronike më 1-2 qershor 2024. Sondazhi është në vijim të serisë së sondazheve që Instituti AGENDA ka zhvilluar më parë me financim nga Programi Suedez për Forcimin e Policimit në Komunitet në Shqipëri (SCPA). Gjithashtu, Zaloshnja ka kryer edhe një analizë të vdekjeve/plagosjeve nga krimet dhe aksidentet rrugore për dekadën e fundit.
Gjetjet e analizës së sigurisë dhe barometrit të fundit
Gjatë 6-mujorit të parë të parë të vitit 2024, vdiqën prej krimeve 18 shtetas dhe prej aksidenteve rrugore 74 shtetas, nga 10594 që vdiqën gjithsej në këtë 6-mujor. Pra vetëm 0.87% e vdekjeve gjithsej u shkaktuan nga krimet dhe aksidentet rrugore (ose 8.7 për 1000 vdekje nga të gjitha shkaqet). Krahasimisht, në të njëjtën periudhë të një viti më parë, vdekshmëria nga krimet dhe aksidentet rrugore ishte 10 për 1000 vdekje nga të gjitha shkaqet. Pra kemi patur një ulje 12.9% të indikatorit të vdekshmërisë nga krimet dhe aksidentet rrugore më 2024 (shihni tabelën më poshtë).
Ulja e indikatorit të vdekshmërisë nga krimet dhe aksidentet rrugore më 2024 është në vijim të trendit të fortë ulës përgjatë dekadës së fundit (shihni grafikun e mëposhtëm).
Krahasuar me Bashkimin Europian, jemi afruar shumë përsa i përket indikatorit të vdekshmërisë nga krimet dhe aksidentet rrugore, ndërkohë që e kemi 46% më të ulët se sa fqinji ynë i ngjashëm, Mali i Zi (shihni grafikun e mëposhtëm).
Pothuaj treçereku (74.7%) i të anketuarve në Barometrin e qershorit anojnë nga vlerësimi pozitiv për reagimin e Policisë së Shtetit në rastet e dhunës ndaj personit (48.8% pozitiv dhe 25.9% anojnë pozitiv). Nga një ekstrapolim i përafërt statistikor, rezulton se rreth 1.5 milionë banorë të rritur gjithsej anojnë nga vlerësimi pozitiv. S.B
