Sekretari i Përgjithshëm i Partisë Demokratike Flamur Noka ju ka dërguar anëtarëve të kryesisë një mesazh ku kërkon të jenë aktivë në protestat e organizuara nga PD. “Jemi Kryesi e PD dhe duhet të jemi në ballë të çdo aksioni, proteste, përballje dhe revoltë”, tha Noka.
Opozita shqiptare pritet që në shtator të nisë aksionin e saj politik kundër qeverisë Rama si dhe të përgatitet për zgjedhjet parlamentare që pritet të zhvillohen në muajt e parë të vitit 2025. Protetsta e shpeshta para Bashkisë së Tiranës si dhe tek “Rruga e Shpresës” poshtë ballkonit të Sali Berishës duket se janë zbehur e braktisur, jo vetëm nga anëtarësia dhe demokratët, por edhe nga nivelet e larta në PD që janë anëtarët e Kryesisë. Të paktën kjo kuptohet nga një mesazh që Flamur Noka, Sekretar i Përgjithshëm në Partinë Demokratike ju ka dërguar anëtarëve të Kryesisë së Partisë Demokratike. “Të dashur miq. Uroj që të keni kaluar mirë pushimet. Stina e vjeshtës për PD dhe opozitën do të kthehet në një stinë protestash dhe revolte, mosbindje civile ndaj narko-regjimit me qëllim krijimin e qeverisë teknike si të vetmen rrugë për ti dhënë vendit zgjedhje të lira. Ky angazhim kërkon më se paku pjesëmarrjen e çdo anëtari/e të kryesisë, të grupit parlamentar, këshillit kombëtar dhe pastaj edhe të strukturave të tjera të varësisë deri tek anëtarët dhe mbështetësit tanë në këtë aksion. Duhet të rifillojmë me angazhimin në protestat tek Bashkia dhe “Rruga e Shpresës”. Protestat nuk janë detyrë vetëm e anëtarëve dhe simpatizantëve tanë. Jemi Kryesi e PD dhe duhet të jemi në ballë të çdo aksioni, proteste, përballje dhe revoltë. Faleminderit”, shkruan Noka në mesazhin e tij. Ky mesazh vjen në ditët e fundit të gushtit, ku edhe demokratët priten ti kthehen aksionit politik me protesta si dhe me qëllimin për krijimin e një qeverie teknike deri në mbajtjen e zgjedhjeve të reja në 2025. Numri dy i selisë blu vendos edhe një kuotë pjesëmarrjeje në protestat që do të mbahen para Bashkisë apo edhe poshtë ballkonit të liderit demokrat, duke nënvizuar se protestat nuk janë detyrë vetëm e simpatizantëve dhe anëtarëve te thjeshtë, por fillimisht e organeve drejtuese të partisë. Në tubimin e 23-të të opozitës para Bashkisë së Tiranës, militantët e Partisë Demokratike, ishin edhe më të pakët në numër. Të pranishmit janë më pak se efektivët që janë vendosur në një kordon për të ruajtur sigurinë. Përfaqësuesit e opozitës përsëritën thirrjen për dorëheqjen e kryebashkiakut Erion Veliaj të cilin e akuzojnë për inceneratorët dhe dosjen 5D. Nuk munguan sigurisht edhe thirrjet “Lironi Berishën!”, që prej 8 muajsh tashmë është në arrest shtëpie. Në krye të militantëve, Belind Këlliçi, ndoqi edhe këtë javë shembullin e Berishës, ku pas sulmeve në protestën e kaluar drejtuar ndërkombëtarëve këtë herë sulmoi Altin Dumanin dhe SPAK. Këlliçi i ka kërcënuar prokurorët duke thënë se të mos harrojnë se “ka edhe akuza për shpërdorim detyre, fshehje provash, fshehje aktesh, dhe ka edhe akuza të tjera”. “Nëse ju prokurorë të SPAK keni vendosur të bëheni seksion i PS mos harroni se ka edhe akuzë për shpërdorim detyre, fshehje provash, fshehje aktesh, dhe ka edhe akuza të tjera. Jeta është e gjatë”, tha Këlliçi.
