Më shumë se 90,000 ushtarë rus, 400 anije dhe 125 avionë do të marrin pjesë në stërvitjet e përbashkëta që Moska do të zhvillojë së bashku me Pekinin, e që do të shtrihen nga Mesdheu në Paqësor.
Ishte vetë Presidenti rus Vladimir Putin ai që paralajmëroi Shtetet e Bashkuara kundër përpjekjeve për të kapërcyer Moskën në Azi, ndërsa luftanijet ruse dhe kineze filluan stërvitjet e përbashkëta detare, më të mëdhatë në epokën post-sovjetike.
Putin tha se stërvitja më e gjerë strategjike “Ocean-2024” do të zhvillohet nga Mesdheu në Paqësor dhe do të testojë gatishmërinë luftarake të njësive dhe përdorimin e armëve me precizion të lartë.
“Ne i kushtojmë vëmendje të veçantë forcimit të bashkëpunimit ushtarak me kombet mike”, u tha ai zyrtarëve ushtarakë gjatë fjalimit televiziv për hapjen e shkollave të mesme. “Sot, në kontekstin e rritjes së tensioneve gjeopolitike në botë, kjo është veçanërisht e rëndësishme. Ne shohim se SHBA po përpiqen të ruajnë me çdo kusht dominimin e tyre ushtarak dhe politik global”, tha Putin.
Më tej ai shtoi se Rusia duhet të jetë gati për çdo zhvillim dhe do të vazhdojë të ndërtojë forcat e saj detare, duke përfshirë komponentin e tyre bërthamor, përballë asaj që ai e përshkroi si një garë armësh të provokuar nga Uashingtoni.
“Nën maskën e kundërshtimit të kërcënimit të perceptuar rus dhe frenimit të Republikës Popullore të Kinës, Shtetet e Bashkuara dhe satelitët e saj po rrisin praninë e tyre ushtarake pranë kufijve perëndimorë të Rusisë, në Arktik dhe në rajonin Azi-Paqësor. Shtetet e Bashkuara dhe aleatët e tyre deklarojnë hapur planet e tyre për të vendosur raketa me rreze të mesme dhe të shkurtër veprimi në të ashtuquajturat zona të avancuara. Me veprimet e tyre agresive, SHBA po përpiqen të arrijnë një avantazh të prekshëm ushtarak, duke thyer kështu arkitekturën ekzistuese të sigurisë dhe ekuilibrin e fuqisë në rajonin Azi-Paqësor”, nënvizoi kreu i Kremlinit.
Komandanti i marinës Alexander Moiseyev i tha Putinit se katër anije kineze dhe 15 avionë po marrin pjesë në stërvitje me forcat ruse.
Agjencia zyrtare e lajmeve kineze Xinhua raportoi dje se synon “të thellojë nivelin e koordinimit strategjik midis ushtrive kineze dhe ruse dhe të rrisë aftësinë e tyre për t’iu përgjigjur së bashku kërcënimeve të sigurisë”.
Stërvitjet detare me Kinën janë pjesë e stërvitjeve shumë më të mëdha ruse që do të zgjasin deri më 16 shtator në oqeanin Paqësor dhe Arktik , si dhe në detet Mesdhe, Baltik dhe Kaspik. Moiseyev i tha Putinit se ato do të përfshijnë më shumë se 7,500 njësi armatimesh. /E.T
