Juli, bashkë me aventurat e tij të prej disa viteve, nuk është personazh i panjohur për publikun, përkundrazi. Kanë qenë të shumta përvojat e tij të rralla të udhëtimeve, duke i jetuar me fare pak para, ose pa para, përmes një jetese minimale, me çadër me vete, ushqime bazike dhe një botë të tërë për të eksploruar. Që nga rrugëtimet me autostop jashtë shtetit e deri te ato përpjekjet e tij me makina modeste që e kanë lënë në gjysmë të rrugës, Juli i ka provuar pak të gjitha.
Mirëpo, disa kohë më parë nisi një udhëtim që nuk e përfundoi dot. Xhiron e Shqipërisë në këmbë, nga Vermoshi në Konispol.
Prej pak ditësh, që nga 16 shtatori, i është rrikthyer sërish qëllimit të tij për ta prekur të gjithë vendin e tij me këmbë. E ka nisur këtë aventurë të re nga Burreli, për të ndjekur rrugën me të gjitha të papriturat. Herë me ushqim, herë jo, Juli po njeh rrugës përvojat dhe jrtën e banorëve, mbijetesën e jetesës në fshat, por edhe kënaqësitë e punës së njerëzve që jetojnë aty. Të presim e të shohim ç’do të sjellë rruga për Julin, sa do të zgjasë, dhe ç’shije do të lërë kjo përvojë.S.B
