Kryetari i Partisë Demokratike, Sali Berisha, bën thirrje për mobilizimin e diasporës shqiptare në zgjedhjet e ardhshme për të mbështetur opozitën dhe për të sfiduar regjimin aktual të cilin e cilëson “narkoshtet”.
Në mungesë të lirisë, kryetari i Partisë Demokratike, Sali Berisha, foli online me qytetarët që morën pjesë në një tubim të organizuar nga PD në Londër. Takimi u zhvillua në një sallë të vogël, ndërkohë që nga Tirana ishin të pranishëm përfaqësuesit e zyrës së shtypit të PD-së. Ky bashkëbisedim shërbeu si një mundësi për Berishën që të dërgonte mesazhin e tij për shqiptarët e diasporës, duke theksuar se ata mund të luajnë një rol të rëndësishëm në zgjedhjet e ardhshme për të mbështetur opozitën dhe për të kontribuar në “arkivimin e narkoshtetit”. Në fjalën e tij, Berisha akuzoi qeverinë e Edi Ramës për keqmenaxhim të vendit dhe përdorimin e frikësimit dhe korrupsionit për të ruajtur pushtetin, duke e cilësuar regjimin aktual një diktaturë që ka për qëllim të eliminojë çdo kundërshtar të mundshëm, përfshirë edhe liderët e opozitës. Ai theksoi se Shqipëria ka më shumë të burgosur politikë se disa shtete autoritare si Bjellorusia dhe Rusia, dhe shtoi se qeveria ka shpërfillur interesat e qytetarëve dhe të Kosovës. Berisha theksoi se shumë shqiptarë janë detyruar të braktisin vendin për shkak të varfërisë dhe kushteve të jetesës, duke i akuzuar autoritetet për menaxhimin e dobët të ekonomisë dhe shpërndarjen e fondeve për projekte të dyshimta. Sipas tij, varfëria dhe papunësia janë pasojë direkte e keqadministratës dhe korrupsionit të qeverisë, ndërsa “kullat e drogës” janë një shembull i qartë i keqpërdorimit të fondeve dhe asaj që ai e quajti një “model të shkatërrimit”. Një tjetër çështje që Berisha trajtoi ishte ndikimi i qeverisë shqiptare në politikën rajonale. Ai kritikoi ashpër qëndrimin e Ramës ndaj Kosovës, duke e akuzuar atë për ndërhyrje në punët e brendshme të Kosovës dhe për vendosjen e sanksioneve ndaj këtij shteti, një veprim që, sipas tij, i dëmton interesat kombëtare. Berisha e krahasoi Ramën me presidentin serb Aleksandar Vuçiç, duke e quajtur atë një aleat të tij dhe një kërcënim për sigurinë dhe integritetin e Kosovës. Në fund të takimit, Berisha bëri një thirrje të fuqishme për veprim, duke i ftuar shqiptarët e diasporës që të angazhohen aktivisht për të mbështetur opozitën dhe për të kontribuar në ndryshimin e qeverisjes aktuale. Ai u bëri thirrje të gjithë shqiptarëve, kudo që janë, të përdorin fuqinë e votës së lirë për të siguruar një të ardhme më të drejtë dhe demokratike për Shqipërinë. Berisha theksoi se vetëm me angazhim të përbashkët dhe mobilizim të diasporës mund të arrihet ndryshimi që vendi ka nevojë dhe se koha për një revolucioni politik në Shqipëri ka ardhur.
