Engëll Cani, babai i Martin Canit i cili mbeti i vrarë në konfliktin mes të miturve pranë shkollës 9 vjeçare “Fan Noli”, ka dëshmuar për herë të parë në polici, teksa i janë kthyer dhe sendet personale që kishte me vete Martini, bashkë me çantën me librat e shkollës.
I pyetur për të gjithë dinamikën e ngjarjes dhe si u njoftua mbi konfliktin që djali i tij kishte patur katër ditë përpara me autorin e vrasjes Mario Përlleshaj, për llogari të hetimeve ai ka sqaruar se nuk është vënë në dijeni mbi këtë problematikë të krijuar në mjediset e shkollës dhe as nuk ka marrë sqarime nga instancat e tjera për gjithçka ndodhi në harkun e pak ditëve.
Në komunikim me Oficerët e Policisë Gjyqësore, edhe nëse familja e autorit të dyshuar i ka kontaktuar apo takuar pas ngjarjes, Engjëlli thotë se deri më sot nuk ka ndodhur diçka e tillë.
Babai i të ndjerit pretendoi se bashkëshortja e tij ka marrë vetëm një telefonatë nga shkolla për çfarë kishte ndodhur, dhe pavarësisht tentativave për t’u lidhur me stafin e shkollës, nuk iu është ngritur telefoni. Engjëll Cani u shpreh gjithashtu se atë çfarë ka ndodhur e ka mësuar pasi ka mbërritur në spital, momentin kur mjekët e njoftuan se djali i tij nuk i mbijetoi plagëve të marra.
Mario Përlleshi ndodhet në masën ‘Arrest në burg’, në pritje të vendimit të Apelit me Juridiksion të Përgjithshëm, Tiranë pasi e ka kundërshtuar vendimin e Shkallës së Parë me pretendimin se ngjarjen e ka kryer në kushtet e vetëmbrojtjes.
