Protesta e opozitës është shndërruar në një betejë juridike mes Partisë Demokratike dhe institucioneve shtetërore. Fillimisht ka qenë Policia e Shtetit që njoftoi procedimin penal për 40 protestues, përfshi edhe deputetë, më pas erdhi kundërpërgjigjia ku drejt SPAK partia me e madhe opozitare ka denocuar kreun e ministrisë së brendshme dhe drejtues të policisë. Taktika politike, padi-kundërpadi!
Protesta e organizuar nga Partia Demokratike dhe aleatët e saj politikë mbrëmjen e djeshme ka përfunduar me një valë kallëzimesh dhe procedimesh penale të ndërsjella mes opozitës dhe Policisë së Shtetit. Tensionet, që nisën në rrugët e Tiranës me përplasje mes protestuesve dhe policisë, tashmë kanë kaluar në një front tjetër, atë të institucioneve të drejtësisë. Nga njëra anë, Partia Demokratike ka kallëzuar penalisht Ministrin e Brendshëm, Drejtorin e Përgjithshëm të Policisë, Drejtorin e Policisë së Tiranës dhe disa zyrtarë të tjerë të Policisë së Shtetit, duke i akuzuar për gjashtë vepra penale të rënda, të cilat, sipas saj, janë kryer në bashkëpunim dhe të motivuara politikisht. Nga ana tjetër, Policia e Shtetit ka njoftuar se ka proceduar në gjendje të lirë 40 persona, përfshirë deputetë të opozitës, dhe ka arrestuar shtatë protestues, duke i akuzuar për bllokim të akseve rrugore dhe kundërshtim të forcave të rendit.
Partia Demokratike akuzon Policinë për dhunë
Grupi Parlamentar i Partisë Demokratike, përmes kryetarit të tij, Gazment Bardhi, ka dorëzuar një kallëzim penal në SPAK dhe Prokurorinë e Tiranës, duke akuzuar drejtuesit më të lartë të Policisë së Shtetit për veprime që, sipas tyre, kanë shkelur të drejtat kushtetuese të qytetarëve dhe të opozitës. Në kallëzim, PD pretendon se veprimet e policisë gjatë protestës ishin të paligjshme dhe të dhunshme, duke përbërë një ndërhyrje arbitrare dhe të motivuar politikisht ndaj një tubimi të ligjshëm. Sipas deklaratës zyrtare të PD-së, Policia e Shtetit ka ndërhyrë në mënyrë të pajustifikuar dhe ka përdorur dhunë fizike dhe psikologjike ndaj protestuesve, përfshirë deputetët e opozitës dhe qytetarët e thjeshtë. Kallëzimi përfshin akuza për një sërë veprash penale, duke përfshirë “Shpërdorim të detyrës”, “Pengim të ushtrimit të të drejtës për t’u shprehur, grumbulluar apo manifestuar”, “Shkelje të barazisë së shtetasve”, “Dëmtime me dashje” dhe “Kryerje të veprimeve arbitrare”. Sipas PD-së, këto veprime janë të orkestruara nga nivelet më të larta të qeverisë dhe Policisë së Shtetit, duke përfaqësuar një akt të pastër intimidimi politik ndaj opozitës. Gazment Bardhi ka deklaruar se Partia Demokratike do të ndjekë çdo hap ligjor për të siguruar që zyrtarët përgjegjës të mbajnë përgjegjësi për atë që e ka cilësuar si një ndërhyrje kriminale dhe shkelje të hapur të ligjit. Ai ka paralajmëruar gjithashtu se ky kallëzim është vetëm fillimi i një përpjekjeje më të gjerë për të vënë drejtësi në rastet e dhunës ndaj opozitës.
Policia e Shtetit akuzon opozitën
Nga ana tjetër, Policia e Shtetit ka bërë të ditur përmes një deklarate publike se gjatë protestës së djeshme janë kryer shkelje serioze të rendit dhe sigurisë publike nga ana e disa deputetëve dhe përfaqësuesve të opozitës. Sipas Policisë, disa nga deputetët e pranishëm në protestë, përfshirë figura të njohura si Gazment Bardhi, Albana Vokshi, Oerd Bylykbashi dhe Flamur Noka, kanë bërë thirrje për bllokimin e akseve kryesore rrugore, duke penguar lëvizjen e qytetarëve dhe automjeteve. Policia pretendon se këto veprime kanë qenë të koordinuara dhe kanë cënuar rëndë rendin publik, ndërsa protestuesit kanë kundërshtuar forcërisht urdhrat e punonjësve të Policisë për të liruar rrugët. Në bilancin zyrtar të Policisë pas protestës rezultojnë shtatë persona të arrestuar dhe 40 të proceduar në gjendje të lirë. Policia ka deklaruar se mes të proceduarve gjenden edhe emra të njohur të politikës shqiptare, si Luçiano Boçi, Erisa Xhixho, Çlirim Gjata dhe Xhelal Mziu. Veprimet e tyre, sipas raportit të Policisë, kanë përbërë një shkelje të hapur të ligjit dhe janë bërë me qëllimin për të tensionuar situatën dhe për të provokuar përplasje me forcat e rendit. Protesta e së hënës dhe ngjarjet që pasuan janë reflektim i përplasjeve të vazhdueshme mes opozitës dhe qeverisë, ku secila palë akuzon tjetrën për shkelje të ligjit dhe abuzim me pushtetin. Nga njëra anë, Partia Demokratike pretendon se Policia ka vepruar si një mjet politik i qeverisë, duke shtypur të drejtat e qytetarëve dhe duke ushtruar dhunë ndaj opozitës. Nga ana tjetër, Policia e Shtetit thekson se ka vepruar në përputhje me ligjin dhe akuzon opozitën për organizim të paligjshëm dhe përpjekje për destabilizim të situatës. Përplasja e ndërsjellë mes opozitës dhe institucioneve ka kaluar tashmë në duart e drejtësisë, e cila pritet të vendosë mbi përgjegjësitë dhe faktet e ngritura nga të dyja palët. Kjo situatë ka krijuar një atmosferë tensioni në arenën politike dhe pritet të mbetet një çështje e nxehtë në debatin publik për javët në vijim. Si opozita ashtu edhe qeveria kanë paralajmëruar se nuk do të tërhiqen nga pozicionet e tyre dhe do të kërkojnë që drejtësia të japë verdiktin përfundimtar mbi ngjarjet e fundit.
Deputetët e kallzuar
Albana Vokshi
Oerd Bylykbashi
Flamur Hoxha
Petrit Doda
Agron Gjekmarkaj
Elda Hoti
Lefter Maliqi
Tedi Blushi
Gazment Bardhi
Luçiano Boçi
Lefter Gështenja
Saimir Korreshi
Erisa Xhixho
Ina Zhupa
Ludovik Hasani
Flamur Noka
Çlirim Gjata
Xhelal Mziu
