Një vajzë 8-vjeçare nga Arizona ka shkruar një letër plot zemërim për prindërit e saj pasi zbuloi se Babagjyshi nuk ekzistonte. Pas një diskutimi në shkollë, kur një bashkëmoshatar i tha se Babagjyshi dhe Elfët nuk ishin të vërtetë, ajo u ndje e tradhtuar dhe kërkoi të dinte nga prindërit e saj nëse kjo gjë ishte e vërtetë.
Ata, të gjendur përballë kësaj situate, i treguan të vërtetën, por vajza, e zemëruar, i akuzoi ata si gënjeshtarë dhe e quajti një tradhti të madhe.
Letra e saj, e cila është shpërndarë në Reddit, u bë shumë virale për sinqeritetin dhe gjithçka që ajo shprehte aty.
“Më keni gënjyer për tetë vjet! Nuk mund t’ju fal”, thuhej në letrën e vajzës teksa i cilësonte prindërit shkatërrues të ëndrrave dhe tradhtarë.
Pjesa më e rëndësishme e letrës ishte kur ajo shprehu hidhërimin dhe dhimbjen e saj, duke e mbyllur me një mesazh tepër domethënës.
“P.S. Kurrë mos falni një gënjeshtar dhe një tradhtar”, shkroi vajza.
Ndërkohë shumë komentues dyshuan për autenticitetin e letrës dhe sipas tyre mund të ishte një shpikje për të tërhequr vëmendje, por prindërit e vajzës i hodhën poshtë këto akuza.
Ata e pranuan se ishte një moment i vështirë për vajzën, por gjithashtu e konsideruan këtë shprehje të forcës dhe sinqeritetit si një shenjë të mrekullueshme të aftësisë së saj për të shprehur emocionet./e.t
