Atmosfera e ngrohtë festive na shpërqendron nga vëmendja që duhet t’i japim sigurisë kibernetike. Përgjatë vitit 2024 Autoriteti Kombëtar për Sigurinë Kibernetike ka identifikuar 8.506 rrjedhje të dhënash. AKSK ju bën thirrje qytetarëve të tregohen më të kujdesshëm gjatë kësaj periudhe.
“Jemi në një periudhë festash dhe kjo kohë është e artë për mashtruesit online. Gjatë 2024 kemi pasur shifra alarmante, kemi rritje të numrit të sulmeve shumë të lartë ku qytetarët janë bërë pre e sulmeve financiare online”, tha Esmeralda Kazia.
Drejtoresha e monitorimit dhe raportimit të incidenteve kibernetike ka listuar rastet më të shpeshta të sulmeve që janë rrezik për qytetarët.
“Në rast se merrni mesazhe apo e-maile apo oferta që mund të duken shumë të mira për të qenë të vërteta mos i klikoni. Siguroni pajisjet tuaja, krijoni një fjalëkalim të fortë dhe bëni blerje nga platforma të besueshme që të shmangni sulmet kibernetike financiare online”, tha Kazia
Ndër të tjera AKSK ju bën apel qytetarëve që për çdo rast të dyshimta të raportojnë pranë këtij institucioni./ S.M
