Ajo që ishte paralajmëruar dhe që të gjithë prisnin, që Berisha do t’i përdorte primaret brenda PD-së si giotinë për të ‘prerë’ kokat e grupit të deputetëve të Gazment Bardhit, duke se përditë e më shumë po zbulohet dhe po bëhet realitet.
Gazment Bardhi dje dhe Kreshnik Çollaku sot janë shprehur kundër zhvillimit të tyre, sepse e kanë ndjerë rrezikun e ‘lojës’ së Berishës.
Nga ana e tij, Berisha është treguar i ‘kujdesshëm’, duke folur për primare për diasporën, as duke përjashtuar as duke konfirmuar primaret për deputetë, ndërkohë që ka nxjer Flamur Nokën, i cili, me urtësinë që e karakterizon, u ka bërë thirrje deputetëve të PD-së që të lënë egot e tyre mënjanë dhe të shohim përtej tyre.
Mesazhi i Nokës është i qartë dhe një shuplakë e parë për deputetët e grupimit të Gazment Bardhit, të cilët menduan se mund t’ia hidhnin Berishës dhe ta përdornin atë, duke harruar se ekperienca e tij si sekretar partie në PPSH është e barabartë ndofta vetëm me angazhimin e pjesës së tyre më të madhe në politikë.
Bashkimit në diversitet që Bardhi shpalli për t’u bashkuar me Berishën, me shpresën për t’i dhënë fund Lulzim Bashës, duket se po i vjen fundi dhe maskat e hipokrizisë po çirren përditë.
Nëse primaret bëhen, Bardhi dhe të tijët do shkojnë në giotinë si cjapi te kasapi. Nëse ato nuk bëhen, do të jetë sërish Berisha ai që do ta bëjë listën, duke e mbushur atë vetëm me besnikë të tij.
Në të dyja rastet, humbin hipokritët dhe fitojnë besnikët e Berishës./K.K
