Pas deklaratës së Kryeministrit Rama pak ditë më parë se Shqipëria do të ketë Bankën Shqiptare të Zhvillimit, Ministria e Shtetit për Sipërmarrjen dhe Klimën e Biznesit ka nxjerrë për konsultim publik projektligjin.
Projektligji “Për Bankën Shqiptare të Zhvillimit”, ka si qëllim themelimin dhe përcaktimin e rregullave për organizimin dhe funksionimin e një institucioni financiar zhvillimi, i ngjashëm me bankat apo institucionet kombëtare promovuese që funksionojnë në Bashkimin Evropian.
Synimi i Bankës Shqiptare të Zhvillimit e cila do të njihet edhe me emrin e shkurtuar BZH, ka synim kryesor nxitjen e zhvillimit ekonomik dhe social të vendit, mbështetjen e ndërmarrjeve të vogla dhe të mesme, përfshirë mikrondërmarrjet dhe start up-et.
Objektivat kryesore të Bankës Shqiptare të Zhvillimit do të jenë edhe promovimi i eksporteve apo mbështetja e projekteve me rëndësi për zhvillimin ekonomik.
Në projektligj përcaktohet se shteti shqiptar do të jetë aksioneri kryesor dhe fillestar i BZH-së, me një pjesëmarrje minimale prej 51% të kapitalit. Nga ana tjetër, lejohet përfshirja e institucioneve financiare ndërkombëtare dhe entiteteve të tjera të përcaktuara nga Këshilli i Ministrave.
Po ashtu, përcaktohet se kapitali fillestar i Bankës Shqiptare të Zhvillimit do të jetë 10 miliardë Lekë, i kontribuuar nga shteti shqiptar dhe i shlyer brenda një afati 4-vjeçar, sipas rregullave të përcaktuara në statut.
Banka Shqiptare e Zhvillimit do të ketë të drejtë të hapë llogari bankare në Bankën e Shqipërisë, në Thesarin e Shtetit, si dhe në banka tregtare vendase ose ndërkombëtare.
Banka Shqiptare e Zhvillimit do të jetë e përjashtuar nga tatimi mbi fitimin, duke mundësuar fokusimin e burimeve në arritjen e objektivave të saj të zhvillimit./E.T
