Kryetari i PD-së, Sali Berisha, është nisur drejt Gjermanisë për të marrë pjesë në Kongresin Elektoral të CDU-së, pas një ftese zyrtare si përfaqësues i opozitës shqiptare. Kjo është hera e parë që ai udhëton jashtë vendit pas heqjes së masës së arrestit shtëpiak në kuadër të hetimeve për çështjen “Partizani”. Berisha mori leje nga SPAK për këtë udhëtim.
Kryetari i Partisë Demokratike, Sali Berisha, është nisur dje drejt Gjermanisë për të marrë pjesë në Kongresin Elektoral të CDU-së. Kjo është vizita e tij e parë jashtë vendit pas heqjes së masës së arrestit shtëpiak, ndërsa ai ka marrë leje nga SPAK për këtë udhëtim. Sipas njoftimeve zyrtare nga zyra e shtypit të PD-së, Berisha është ftuar në këtë kongres si përfaqësues i opozitës shqiptare. CDU është një nga partitë kryesore të Partisë Popullore Evropiane, ku bën pjesë edhe PD-ja. Berisha ka deklaruar se do të jetë pjesë e punimeve të kongresit, ku do të marrin pjesë liderë të tjerë të partive të qendrës së djathtë në Evropë. Në një deklaratë për mediat, kryedemokrati bëri të ditur se kishte menduar të organizonte edhe një takim me shqiptarët që jetojnë në Gjermani, por për shkak të axhendës së ngjeshur, një gjë e tillë nuk ka qenë e mundur. Megjithatë, ai është shprehur se në një moment të dytë do të zhvillojë një vizitë të posaçme për t’u takuar me emigrantët shqiptarë. Pjesëmarrja e tij në këtë event vjen në një moment të rëndësishëm për Partinë Demokratike, e cila po përgatitet për të finalizuar procesin e primareve. Berisha ka theksuar se PD po punon për forcimin e lidhjeve me diasporën dhe ka ngritur çështjen e njohjes së dokumenteve biometrike të shqiptarëve jashtë vendit nga autoritetet shqiptare, duke kërkuar një trajtim të barabartë me praktikat që ndjek Kosova në këtë aspekt. Gjatë prononcimit për gazetarët, Berisha gjithashtu ka bërë disa deklarata mbi zhvillimet politike në vend, duke akuzuar qeverinë për përpjekje për të frenuar të drejtat e diasporës në votim dhe duke nënvizuar rëndësinë e një procesi të lirë e të ndershëm zgjedhor për shqiptarët që jetojnë jashtë vendit. Kryetari i PD-së ka qenë në arrest shtëpie për disa muaj për shkak të hetimeve në dosjen “Partizani”, ku ai akuzohet për shpërdorim detyre në favor të familjarëve të tij. Aktualisht, ndaj tij është caktuar masa e detyrimit të paraqitjes, ndërsa hetimet nga SPAK vijojnë.
Krimet zgjedhore
PD kërkon të hetohen nga prokuroria, jo SPAK
Në prag të zgjedhjeve parlamentare të 11 majit, Prokuroria e Posaçme kundër Korrupsionit dhe Krimit të Organizuar (SPAK) ka nisur ngritjen e një strukture hetimore për krimet zgjedhore, për të adresuar shqetësimet e lidhura me manipulimin e votës dhe shit-blerjen e saj. Sidoqoftë, opozita ka shprehur shqetësim për mënyrën se si SPAK po e trajton këtë çështje dhe ka kërkuar që përgjegjësia për hetimet të kalojë në dorë të Prokurorit të Përgjithshëm, Osljan Çela. Deputeti demokrat, Oerd Bylykbashi, kritikoi ashpër SPAK-un, duke theksuar se, edhe pse kjo prokurori është krijuar për të luftuar korrupsionin dhe krimin e organizuar, nuk është treguar e efektshme në hetimin e krimeve zgjedhore, veçanërisht përsa i përket shit-blerjes së votës që vazhdon të ndodhë në Shqipëri dhe në diasporë. Sipas Bylykbashit, hetimet janë vonuar dhe për pasojë, qytetarët kanë humbur besimin në sistemin e drejtësisë. “SPAK ka refuzuar të merret me krimin zgjedhor. Letrat dhe procedurat nuk i duhen askujt për sa kohë nuk ka efikasitet. Duhet të kemi veprime konkrete dhe ndëshkime të shpejta për ata që janë përfshirë në korrupsion zgjedhor,” tha Bylykbashi. Opozita gjithashtu ka kërkuar që Prokurori i Përgjithshëm, Osljan Çela, të ndërmarrë një monitorim të rreptë mbi policinë e shtetit gjatë periudhës zgjedhore, pasi sipas tyre, ka pasur raste kur forca të policisë janë përfshirë në aktivitete të dyshimta gjatë proceseve zgjedhore të kaluara.Me një klimë politike të tensionuar dhe një angazhim të theksuar për pastrimin e sistemit zgjedhor, ky zhvillim ka nxitur debate të ashpra midis pushtetit dhe opozitës për mënyrën e trajtimit të krimeve zgjedhore dhe mbrojtjen e integritetit të procesit demokratik.
Rama: 80% e qytetarëve ndihen të sigurt, 20 qytete do të survejohen me kamera
Kryeministri Edi Rama dhe ministri i Brendshëm, Ervin Hoxha, morën pjesë në prezantimin e një anketimi mbi perceptimin e qytetarëve për nivelin e sigurisë dhe besimin te Policia e Shtetit. Sondazhi, i financuar nga Suedia, tregon se 82% e qytetarëve ndihen të sigurt në zonat ku banojnë, një rezultat që sipas Ramës vjen si pasojë e punës së Policisë së Shtetit. Në fjalën e tij, kryeministri theksoi rëndësinë e barazisë para ligjit si themel i një shteti të qëndrueshëm, duke vënë theksin te reformat dhe procesi i integrimit europian. Sipas tij, çelja e negociatave me Bashkimin Europian është një tregues i progresit të bërë në forcimin e shtetit të së drejtës dhe garantimin e sigurisë publike. Një nga masat kryesore që Rama njoftoi është vendosja e një sistemi të ri survejimi në qytetet kryesore të vendit. Projekti, i cili do të nisë me 20 qytete, parashikon instalimin e kamerave të avancuara që do të monitorojnë lëvizjen në rrugë dhe shkeljet ligjore. Pamjet do të transmetohen në salla të dedikuara, duke synuar rritjen e sigurisë dhe forcimin e kontrollit mbi rendin publik. “Kjo është një reformë epokale për mënyrën se si do të garantohet siguria në qytete. Monitorimi i rrugëve dhe hapësirave publike do të ndihmojë në evidentimin e shkeljeve dhe identifikimin e autorëve të krimeve apo kundërvajtjeve,” deklaroi Rama. Përveç kësaj, ai vlerësoi bashkëpunimin mes qytetarëve dhe institucioneve të rendit, duke theksuar se siguria është një përgjegjësi e përbashkët dhe se angazhimi i komunitetit është kyç për ruajtjen e rendit./k.k
