Kryeministri Edi Rama tha se më 11 maj shqiptarët do të tregojnë me votë se janë me zhvillimin, me projektet që e çojnë vendin përpara dhe me ndryshimet reale që po ndodhin në çdo sektor, duke refuzuar llumin politik që kërkon t’i mbajë peng me baltë, shpifje dhe retorikë boshet
Kryeministri Edi Rama ka vijuar replikat në rrjetet sociale, ku ka dhënë një mesazh të fortë për zgjedhjet e 11 majit. Në një koment ndaj kritikëve, ai është shprehur se “llumi po pastrohet dhe do të pastrohet edhe më shumë më 11 maj”, duke nënkuptuar se procesi politik dhe ndryshimet në vend do të vijojnë pavarësisht sulmeve nga kundërshtarët. Ky qëndrim i fortë vjen ndërsa na ndajnë 100 ditë nga zgjedhjet dhe pas fjalës së tij në Kuvendin Kombëtar Rinor për Shqipërinë 2030, ku theksoi se Partia Socialiste është forca që po drejton vendin drejt zhvillimit të qëndrueshëm. Rama u shpreh se Shqipëria është në një proces të pakthyeshëm ndryshimi dhe se, pavarësisht kritikave apo përpjekjeve për ta ndalur, vendi po ecën përpara. Ai i dha një rëndësi të veçantë rolit të rinisë në këtë proces, duke theksuar se ata do të jenë forca që do të refuzojë “kënetën dhe bufin e stërplakur”, një referencë e qartë për kundërshtarët politikë. “Nga sot, 100 ditë do t’i bëjnë të rinjtë dhe të rejat ta refuzojnë kënetën dhe bufin e stërplakur, dhe të gjitha bretkosat politike dhe mediatike. Ata do i bashkohen trenit të PS në 11 maj, nga Tirana, lokomotiva jonë, që sa më shumë tentojnë ta ndalojnë duke i hedhur baltë, aq më shumë do të jenë të shkelur me votë”, u shpreh ai. Pas fjalimit ditën e shtunë, ai ka vijuar replikat me ndjekësit në rrjetet sociale, ku ka mbrojtur reformat dhe zhvillimin e vendit. Një komentues e akuzoi se manipulon opinionin publik dhe e krahasoi me Enver Hoxhën, por Rama u përgjigj duke thënë se transformimi i Shqipërisë është real dhe se askush nuk ka vdekur për bukë që nga koha e Skënderbeut. Duke sjellë shembuj nga zhvillimi i turizmit në zona si Thethi, ai theksoi se shumë emigrantë po kthehen dhe po investojnë në vendin e tyre, duke krijuar mundësi të reja ekonomike. Ai u ndal edhe te imazhi i Shqipërisë, duke iu përgjigjur atyre që e shohin vendin si të prapambetur. “Shqipëri apo bëhet, të gjitha ndryshimet janë reale, faktet janë atje ku janë një e punës, ku janë sipërmarrjet, ku është jeta e përditshme që nuk duhet nga kanalet dhe portalet e llumit, se ka edhe llum. Ka akoma, po dhe llumi po pastrohet, do të pastrohet edhe më shumë më 11 maj”, përfundoi ai. Mesazhi i Ramës është një sinjal i qartë se PS do të vijojë fushatën me ton të fortë dhe se zgjedhjet e 11 majit do të jenë një betejë për të treguar se Shqipëria është në rrugën e duhur drejt 2030-s.
