Deputeti i Partisë Demokratike, Luan Baçi, ka dhënë disa detaje mbi protestën e opozitës më 8 shkurt, duke e cilësuar atë si një manifestim me një “format të ri” dhe në dorë të qytetarëve. Ai nuk zbuloi strategjinë e plotë të organizimit, por theksoi se opozita është në një fazë të mosbindjes civile dhe aksioneve në terren. Protesta do të mbahet të shtunën në orën 17:00 dhe sipas Baçit, do të jetë një tjetër mjet i fuqishëm për të çuar përpara kërkesat e opozitës.
Sa i përket votës së diasporës, deputeti demokrat akuzoi Partinë Socialiste se po pengon këtë proces, ndërsa PD-ja, sipas tij, është e angazhuar për ta realizuar në mënyrë të plotë. Ai kërkoi që emigrantët të mund të votojnë edhe me dokumente të shteteve të BE-së, SHBA-së apo Britanisë, duke denoncuar përpjekjet e mazhorancës për të vendosur pengesa, përfshirë çështjen e kartave dhe pasaportave të skaduara.
Sipas Baçit, qëllimi i opozitës është të sigurojë të drejtën e votës për të gjithë emigrantët pa përjashtim, ndërsa ai akuzoi PS-në për tentativa të qëllimshme për të dështuar këtë proces. PD-ja, sipas tij, do të vijojë të insistojë që vota e diasporës të realizohet 100%./kb
