Sali Berisha po ia del që mes një procesi që duhet të hapte PD, në fakt po e spastron nga eksponentët e pabindur. Primaret po refuzohen nga një pjesë e deputetëve, të njohur si mbështetës jo të doktorit, por kryesisht të Bardhit.
Pas Helidon Bushatit dhe Ferdinand Xhaferajt, dy deputete, inaktive në parlament dhe politikë, Emilia Koliqi dhe Eralda Tase Bano konfirmojnë se nuk do të jenë pjesë e primareve. Arsyet sipas tyre janë personale, dhe jo politike.
DEPUTETËT E PD QË REFUZOJNË PRIMARET
HELIDON BUSHATI
FERDINAND XHAFERAJ
EMILIA KOLIQI
ERALDA TASE BANO
PETRIT DODA
Kurse, deputeti i ardhur rishtazi në Kuvend, Petrit Doda, tha për Abc Neës se nuk do të kandidojë në primare, pasi do të mbajë postin e kryetarit të degës së PD Kamëz, në të cilën do të udhëheqë edhe fushatën e PD. Deklaron se nuk ka asnjë kundër primareve apo Berishës.
“Unë jam zgjedhur kryetar i degës së PD, Kamëz e Paskuqan. Dhe nuk dua të krijoj problem me primaret. Gara është e lirë për çdo kandidat. Unë do udhëheq fushatën e PD për këto zgjedhje në zonë.”, tha Petrit Doda.
Në 4 vite, Berisha ia ka dalë të afrojë dhe spastrojë deputetët e dalë nga zgjedhjet e 2021. Pasi mori frenat vulën e logon e PD, dhe shpalli ‘non- grata’ Lulzim Bashën dhe Enkelejd Alibeajn, në listën e të larguarve shtohen edhe 10 deputetë, duke përfshirë edhe Agron Shehajn.
DEPUTETËT E BASHA-ALIBEAJ
LULZIM BASHA
ENKELEJD ALIBEAJ
MERITA BAKIU
ORIOLA PAMPURI
FLUTURA AÇKA
ARBI AGALLIU
SELAJDIN JAKUPLLARI
ORIELA NEBIAJ
GËZIM ADEMAJ
Lajmi i mirë është se në radhët e deputetëve të PD në parlamentin e ri do të ketë prurje të reja, por lajm edhe më mi mirë për Berishën është që do mbushë grupin me besnikë të tij, kjo referuar edhe nga drejtuesit politikë që ka përzgjedhur kryedemokrati për fushatën, të cilëve u dha edhe vendin e sigurt në listën për deputet.
LISTA E SIGURT PËR DEPUTET TË PD
SALI BERISHA
FLAMUR NOKA
EDI PALOKA
BELIND KËLLIÇI
OERD BYLYKBASHI
LUÇIANO BOÇI
AGRON GJEKMARKAJ
GAZMENT BARDHI
TOMOR ALIZOTI
IVI KASO
FLAMUR HOXHA
TRITAN SHEHU
BUJAR LESKAJ
ENO BOZDO
XHELAL MZIU
Por nga gjithë kjo përplasje në 4 vite, të fituar dolën vetëm Gazment Bardhi dhe Agron Gjekmarkaj. Të cilët dikur përbetoheshin se më parë do të largoheshin nga politika se të shtrëngonin duart me Berishës, kurse tani, të ulur në prehrin e tij, presin me qetësi mandatin e ardhshëm të deputetit. Gjithë kolegët e tjere te tyre, do të hyjnë në gijotinën e primareve./K.K
