Mjekët e Qendrës Spitalore Universitare Tiranë kanë realizuar me sukses një ndërhyrje të vështirë prej 7 orësh te një 58-vjeçar.
Pacienti prej dy javësh ishte paralizuar për shkak të një hernie diskale torakale të kalcifikuar.
Pas angazhimit të ekipit mjekësor 58 vjeçari sot është në gjendje të ecë dhe ka rifituar të gjitha funksionet autonome.
Shef i Shërbimit të Neurokirurgjisë, Artid Lame thotë se pacienti vetëm pak orë pas ndërhyjes së vështirë filloi që të lëvizte.
“Bëhet fjalë për një pacient 58-vjeçar fizikisht të shëndetshëm, i cili në mesin e dhjetorit pas një pune fizike të zakonshme, ndjeu një dhimbje të fortë në shpinë dhe dhimbje të këmbëve. Pasi bëri rezonacën dhe skaner u pa që kemi të bëjmë me një gjë jo zakonshme, hernie diskale torakale të kalcifikuar që e bën të vështirtë heqjen.
Pasi pamë pacientin e gjykuam të udhës që të konsultohej kirurgun torakal, doktor Ilir Skënduli, vendosëm të bëjmë një kirurgji multidisiplinare. Kemi kryer një operacion rreth 6-7 orë. Kur sheh pacientin të kënaqur lodhja harrohet. Ajo që na bëri të krenohemi për punën tonë ishte se të nesërmen në mëngjes pacienti lëvizte shumë mirë këmbën e majtë, është në gjendje të eci vetë. Megjithatë do të përmirësohet deri në 6 muaj”, tha Artid Lame, Shef i Shërbimit të Neurokirurgjisë.
Operacioni u krye nga Prof. Artur Xhumari, Shef i Shërbimit të Neurokirurgjisë, Prof. Asc. Artid Lame, Dr. Ilir Skënduli, Dr. Maren Ruka. Anestezist Dr. Myfit Saraci dhe instrumentare Manjola Pjetri, Gena Hazizolli, Anxhela Gjona.
Video u shpërnda nga Ministrja e Shëndetësisë, Albana Koçiu./e.t
