Ministria e Mbrojtjes ka hartuar një ligj të ri “Për rezervat materiale të shtetit”. Kjo me argumentin se baza ligjore e vitit 2008 nuk i përgjigjet zhvillimit brenda dhe jashtë vendit.
Shqipëria do të ndryshojë ligjin për rezervat materiale të shtetit. Me argumentin se baza ligjore e vitit 2008 nuk i përgjigjet zhvillimet brenda dhe jashtë vendi, Ministria e Mbrojtjes ka hartuar dhe depozituar në kuvend projektligjin e ri “, “Për rezervat materiale të shtetit”.
“Projektligji ka për qëllim përshtatjen e legjislacionit për rezervat materiale të shtetit me ndryshimet ligjore të bëra në fushën e mbrojtjes civile, riorganizimin infrastrukturor sipas planeve strategjike afatmesme, përditësimin dhe plotësimin e kapaciteteve duke marrë në konsideratë ndryshimet e numrit të popullsisë, lëvizjeve demografike, si dhe nevojave të mundshme në situatat e gjendjes së luftës, gjendjes së jashtëzakonshme, gjendjes së fatkeqësisë natyrore dhe emergjencave civile, vendore e rajonale.”
Një raport i Kontrollit të Lartë të Shtetit tregoi se në rezervat e shtetit në fund të vitit 2023 nuk pati asnjë kilogram grurë dhe asnjë litër ujë e karburant. Në një raport auditi me titull “Rezervat materiale të shtetit në shërbim të qytetarit”, KLSH tregon se ndonëse sasia minimale rezervë e grurit duhej të ishte 300 tonë, karburantit 100 mijë litra dhe ujit 3 mijë litra, në magazina nuk kishte asnjë nga këto produkte.
“Nisur nga problematikat e hasura gjatë zbatimit të ligjit aktual gjatë situatave jo të zakonshme, projektligji ka synuar të trajtojë dhe të japë zgjidhje mekanizmave për plotësimin, shpërndarjen, freskimin dhe mirëmbajtjen e mallrave, në zbatim të së cilave pritet të hartohen aktet e reja nënligjore. Për trajtimin e gjithë nevojave të sipërcituara u pa e arsyeshme hartimi i një projektligji të ri, pasi nevoja për ndërhyrje prekte mbi 70% të përmbajtjes së ligjit aktual në fuqi.”
Sipas Kontrollit të Shtetit gjendja e krijuar kishte ardhur kryesisht si pasojë e mbivendosjes së kompetencave mes institucioneve që administrojnë rezervat Shtetërore. Qeveria ka përcaktuar ndërkohës e buxheti për rezervat materiale të shtetit do të jetë 163 milionë lekë në vit deri në 2027-n. /e.t
