Nën drejtimin e Altin Dumanit, SPAK ka ndërmarrë disa operacione të mëdha, duke vënë në pranga, politikanë, ish-politikanë dhe zyrtarë të lartë, ku emrat “VIP” që të gjithë shqiptarët mendonin se kurrë nuk do të hetoheshin dhe jo më të kishin akuza konkrete si rasti i ish-presidentit Ilir Meta, deputetes Monika Kryemadhi, ish-kryeministrit Sali Berisha, apo kryebashkiakut Erion Veliaj, ish/zv kryeministri Arben Ahmetaj, si dhe ish-ministri Ilir Beqaj.
Por këta nuk do të jenë të vetmit, pasi dosjet brenda Prokurorisë së Posaçme janë mal. SPAK ka zbuluar në programin e transparencës për muajt e fundit të 2024, te regjistri i kërkesave dhe përgjigjeve se 892 kallëzime penale janë bërë ndaj zyrtarëve në periudhën 2019 – dhjetor 2024.
Këto kallëzime lidhen me vepra të ndryshme penale, të parashikuara në nenet përkatëse të Kodit Penal, si më poshtë: Neni 248 – Shpërdorimi i detyrës: Zyrtarët akuzohen për tejkalim të kompetencave ose mosveprim në përputhje me ligjin, duke shkaktuar dëm shtetit. Neni 258 – Shkelja e barazisë në tendera: Kur zyrtarët ndikojnë ose favorizojnë në mënyrë të padrejtë kompani ose individë në prokurimet publike.
Neni 259 – Korrupsioni pasiv i personave që ushtrojnë funksione publike: Marrja e ryshfetit nga zyrtarët në këmbim të favoreve. Neni 260 – Korrupsioni pasiv i funksionarëve të lartë shtetërorë ose të zgjedhurve vendorë: Kur zyrtarë të nivelit të lartë marrin përfitime të paligjshme në këmbim të vendimeve ose veprimeve të caktuara. Neni 257/a – Refuzimi për të deklaruar, fshehja ose deklarimi i rremë i pasurisë: Zyrtarët që nuk raportojnë ose fshehin të ardhurat dhe pasuritë e tyre.
Neni 319/ç – Ushtrimi i ndikimit të paligjshëm ndaj personave që ushtrojnë funksione publike: Kur dikush përpiqet të ndikojë në mënyrë të paligjshme vendimet e një zyrtari. Neni 328/b – Financimi i partive politike ose zgjedhjeve nga burime të paligjshme: Raste kur fonde të dyshimta përdoren për të ndikuar në partitë politike apo procesin zgjedhor.
Strategjia e Dumanit që po iu bën “gropën” me dhjetëra pushtetarëve
Kreu i SPAK për të fundosur zyrtarët e lartë nga gjithë këto denoncime, po ndjek një strategji që ka rezultuar e suksesshme te “peshat e rënda” të politikës. Gjithë këto vite, politika, institucione të kontrolluara prej saj dhe drejtësia e vjetër, kanë qenë bashkë duke shpëtuar pasuritë e tyre të paligjshme. Të gjithë kanë menduar se do t’ia hedhin paq, pasi kanë besuar se i kanë eliminuar të gjitha provat në aferat e tyre.
Por Dumani me strategjinë e tij po iu shkon te pasuria, elementi që po iu bën gropën politikanëve. E njëjta strategji që fundosi ish-ministrin socialist Arben Ahmetaj, si edhe familjet “Meta-Berisha”. Po ashtu e njëjta skemë po ndiqet dhe me kryebashkiakun Erion Veliajn, të cilin po e fundos pasuria. Nga ana tjetër në skanerin SPAK janë shumë personazhe të tjerë që po iu hetohet pasuria.
Ka emra të rëndësishëm të tjerë nga PS dhe opozita që janë në skanerin e Dumanit. Një nga ata është Flamur Noka. Prokuroria e Posaçme ka nisur hetim pasuror për deputetin dhe familjen e tij. Në objektin e hetimit përfshihen hetimi dhe verifikimi i të gjithë transaksioneve financiare në emër të tij, bashkëshortes dhe dy fëmijëve.
Hetimi shtrihet në të gjithë sistemin bankar të Shqipërisë dhe në të gjithë zyrat noteriale të vendit, për të parë dhe verifikuar shitjet, blerjet e pronave apo akt marrëveshjet e tjera të tij apo familjarëve me të tretë. Thuhet se dosja është drejt mbylljes. Po ashtu pasuria po i hetohet dhe Belind Këlliçit.
Shumica e emrave që përmendëm iu janë hapur probleme me SPAK nga denoncimet. Rasti më i freskët është i Veliajt nga denoncuesi anonim Nesti Angoni. Sapo SPAK regjistron kallëzimet dhe nis hetimet, direkt shkohet te sita e pasurisë. Me numrin e madh të denoncimeve që janë bërë gjatë gjithë kësaj kohe nga shifrat zyrtare që zbulon SPAK, paralajmërojnë të tjera zhvillime të forta./ S,M
